Emiliano Sala ruang hmu ta

Cardiff City forward Emiliano Sala leh pilot David Ibbotson-te ruang chu thlawhtheihna kehchhiaah hmuh a ni a, Air Accidents Investigation Branch chuan hetiang lam thiam bik ruaiin ruang pahnih hi an lakchhuah tawh thu an puang.

Nimin zing khan ruang phurtu lawng Geo Ocean III chuan England chhim thlang lama khaw pakhat Dorset sira Portland lawng chawlhhmun a thleng. AAIB chuan, "Ruang hi a zahawm thei ang bera lakchhuah a ni a, thil thlen dan kimchang an chhungte hrilh pah reng a ni," tiin thuchhuah an siam.

Kum 28 mi Sala hi Cardiff City-in pound maktaduai 15-in Nantes FC aṭangin an lalut a, Premier League club a zawm hnu hian a club hlui mang ṭha turin ni hnih chamin Nantes-ah hian a let. January 21 khan thlawhtheihna te Piper Malibu N264DB-ah a khalhtu Ibbotson nen chauh chuangin Nantes aṭangin Cardiff lam panin zan dar 7:15-ah an thlawk chhuak a, English Channel chunga an awm laiin biak pawh theih an ni lo.

Sala thawhtheihna tlakna bula awm Guernsey thliarkara awm thuneituten ni thum an zawn hnuah an beidawng a, mi ṭhahnemngaite sum thawhkhawm hmangin zawn chhunzawm a ni a, hetah hian hetiang lama mi thiam bik marine scientist leh oceanographer David Mearns chu an hotupa niin February 3 khan thlawhtheihna kehchhia hi an hmu.

AAIB lam hian ruang zawn nan 'remotely operated underwater vehicle (ROV)' an hmang a, February 4-ah ruang hi an hmu a, nimin khan ruang hi Dorset coroner (sarthite thih dan endiktu) pan pui a ni.