Joshua vs Fury a thleng ngei ang - Warren

Tyson Fury-a promoter Frank Warren chuan fan-ten a boxer leh Anthony Joshua chu inhmachhawn tura an duh a nih chuan an inhmachhawn tir ngei tur thu a sawi a, "Kan thlentir ngei ang," a ti. 

Fury hian Pathianni zing khan Deontay Wilder hnehin WBC title a la a, Joshua hian heavyweight boxing-a major title dang WBA (Super), IBF leh WBO a kawl mek thung. 

Warren chuan, "He fight hi a thlen ngei kan duh a, kum hnih chhung chu hma kan lo la tawh. Joshua promoter Hearn hian a boxer duhsak takin 70/30-a pawisa insem turin a sawi ṭhin a, tunah chuan a danglam tawh. 

"Tyson hian hlawh tam zawk phu mah se 50/50 an ti a nih pawhin kan pawm a, buaina kan nei lo. Kan thil sawi hi boxer pahnih chungchang a ni a, a pawimawh ber chu fan-te an ni bawk. He fight hi an hmu duh a nih chuan kan thlentir mai tur a ni," a ti. 

Joshua promoter Eddie Hearn pawhin a boxer leh Fury hi an inhnek tur thu a lo sawi tawh a, tuna an buaina erawh Wilder a ni - Fury leh Wilder hian a vawi thum nana inhnek theihna an contract-ah an ziak tel. 

Wilder hian Fury hi a hmachhawn nawn leh duh a nih chuan ni 30 chhungin dilna a thlen a ngai. Wilder leh Fury hi an inhnek nawn leh dawn niin khawthlang media ṭhenkhat chuan an tarlang a, hei hi a thleng a nih chuan Hearn chuan IBF-in Joshua tum tura an tih Kubrat Pulev chu June 20-a an hmachhawn ve phawt tur thu a sawi.