Liverpool an la 'bo' lo

Premier League-a an match hnuhnung pahniha an khingpui an inhnehtawkpui avangin Liverpool-in Premier League nomawi chawi turin thaibo hlawh hman mah se Inrinni zanah an la 'bo' lo tih an pholang a, Bournemouth chu 3-0 in an sawp.

Merseyside club tan Sadio Mane, Georginio Wijnaldum leh Mohamed Salah ten goal khat ṭheuh an khung a, goal difference hmanga lehpel hmantu Manchester City tlanpelin a chung berah an awm. 

City hian nizan khan Chelsea an hmachhawn a, he thu buatsaih a nih lai hian  result kan hre hman lo - result a zirin table hi a danglam leh dawn a, mahse City hian match khatin Reds aiin an khel tam zawk. 

Liverpool hi an league match hnu-hnung pahnih aṭanga teh chuan champion 'zia' hmuh tur a awm lo a, Cherries lakah erawh champion turin an ṭha tawk tih an pholang - inkhel ṭantir lamah Ryan Fraser chuan Alisson 'test' ve zauh mah se hei bak hi Bournemouth-in hun hlauhawm an nei leh tawh lo. 

Reds tan hian match li chhung a zawna goal li a khungna ni turin Mane chuan goal hmahruai a khung a, damlohna avanga a hma zan lawka hotel-ah pawh awm ve thei lo Wijnaldum chuan mawi zetin goal hnihna a khung zui. 

Goal dang lut loin chawlhlawk hman a ni a, second half pawh Liverpool ta tho a ni. Salah chuan minute 48-naah an goal thumna a khung a, he goal luh nana Naby Keita leh Roberto Firmino ball inpe kual vel chu a hmuhnawm hle - Salah hian tun season-ah goal 20 a khung tling der tawh!

Liverpool nomawi chawi tumna kawngah tlarhmaa Mane, Salah leh Firmino ten sawi an hlawh a - Cherries lakah anni pathum hi an hmuhnawm lehpek hle. Premier League-a Liverpool goal hnuhnung 15-a 14 chu an pathum 'ke' chhuak a ni. 

Mane hian goal khat a khung bakah tauh luhna remchang tak a nei bawk a, hei erawh vengtu nei lo chungin a tauh lut thei lo. Firmino-a'n keeper chauh hmachhawn chungin khung thei lo mah se Brazilian striker zia hmuh turin a awm a, a ball khawih vel a hmuhnawm a, Salah pet goal-na tura a ball kheng zeuh chu mawi tak a ni. Egyptian forward hian Firmino siam sak vek khungna remchang nei mah se bar a pet per bawk.

Salah-a'n Reds tan Premier League match 62-ah goal 49 a khung ta a, club khat tana Premier League-a goal 50 khung rang ber Alan Shearer (66 match) record a khum ngei a beiseiawm ta. 

Liverpool tlarhma pathum piahlama sawi hmaih thiang lo chu Georginio Wijnaldum a ni a, Dutch midfielder hi a khel ṭha takzet - ani hi damlohna avangin match an neih hma ni hnih zanah te kha chuan a la luak zak zak a, Zirtawpni zanah team hotel-ah pawh a awm ve lo. 

Reds manager Jurgen Klopp chuan, "Player zawng zawngin match an neih hmaa pumpelh an duh ang zawng zawng hian a buai a ni ber a, mahse rei vak lo ṭha taka a mut hnuah a khelh theih thu min rawn hrilh a, mak ka ti hle. Ka naute rilru puthmang leh nungchang hi tun dinhmun min thlenpuitu a ni," tiin a player-te inpekna a fak.

Liverpool hian chanchin lawmawm dang an neih chu hliam vanga chawl reng Trent Alexander-Arnold chu bench aṭanga luhtir a ni a, a khel chhe lo.