Junior Hockey-ah Mizoram pathumna

9th Hockey India Junior Women National Championship 2019 (A Division)-ah Mizoram hmeichhe team chu pathumna an ni. Kollam, Kerala-a pathumna inchuhnaah Mizoram hian Lalrinfeli leh Lalawmpuii te goal hmangin Uttar Pradesh chu 2-0 in an hneh.

Mizoram hi pool C-ah Gangpur Odisha, Hockey Himachal Pradesh, Andra Pradesh leh Maharastra te nen an awm khawm. Mizoram hian an pool match bikah hian Maharastra an inhnehtawk pui tih loh chu hnehna an chang vek - pool hmahruaitu nichungin quarterfinal an lut.

Inrinni tlai khan semifinal-ah Haryana nen an intawng a, 3-2 in Mizoram an vanduai. Pathumna zawnna bikah erawh Mizoram an chungnung ta zawk a, an beisei ang takin final thleng lo mah se pathumna nih phak hi result ṭha a ni.

Mizoram coach Lalroṭhuami (BTe-i) chuan, "Kan lawm hle a, mahse lawm a kim lo. Semifinal kha chak zawk tur kan ni a, helai Kollam mi inkhel en zawng zawng ten min ṭanin, an rilru pawh a na ve hle. Mahse engkim vangin Pathian hnenah lawmthu kan sawi, kan tan a ṭawngtai tute chungah pawh kan lawm em em bawk a ni.

"Haryana goal hnuhnung ber luh dan kha a dik tawk lo a, hetih lai hian kan goal khung erawh pawm sak kan ni lo thung, referee khan dik takin inkhel thunun ni se la chuan final kan luh ngei ka ring," tiin Vanglaini a hrilh.

Mizoram tan hian SAG, SAI hockey training centre, Thenzawla awm mek te bakah national academy, Delhi a awm te an inlan a, coach BTe-i leh manager R. Lalnunmawii ten an kaihruai a ni.