Vawiinah Lammualah Santosh Trophy

Aizawla khelh tur Santosh Trophy North East Zone qualifying round match hmasa ber chu vawiin chawhnu dar 2:00 hian khelh a ni dawn a, Lammualah Meghalaya leh Tripura an intawng ang. 

Meghalaya leh Tripura hian Santosh Trophy-ah sulhnu chhuan tham sawi tur an la nei lo a, an awmna Group A-ah hian a thlengtu Mizoram an awm tel bawk avangin vawiina chak lo tan final round luh beiseina a chhe dawn.

Tripura-in player langsar tia sawi tur an nei lo a, Meghalaya erawhin defender ṭha pahnih Samuel Shadap leh Banpynkhrawnam Nongkam an kawl avangin anni pahnih ringawt pawh hi thlamuanpui tham an ni. 

Samuel Shadap hi Shillong Lajong tan 2012-17 thleng a khel a, season hmasa khan Indian Super League-ah Kerala Blasters tan a khel. Banpynkhrawnam hi Churchill Brothers defender hlui a ni thung a, an tawnhriat ringawt pawh a ṭangkai ang. 

Santosh Trophy North East Zone qualifying round-ah hian team paruk an inel dawn a, Group A leh B-ah ṭhen hran an ni. Group A-ah hian Meghalaya, Mizoram leh Tripura an awm. 

Group B-ah hian Arunachal Pradesh, Assam leh Manipur an awm a, Nagaland an lo kal lo.

Mikhual team pangate hi Ramhlun Sports Complex-ah an thleng a, team khat hi Synod Conference Centre-ah an thleng thung.