Mexican Open champion Rafael Nadal

Rafael Nadal chuan kumina a nomawi hmasa ber ni turin ATP Mexico Open-ah a champion, nimina final inkhel hmuhnawm takah Spain tlangval hian Taylor Fritz lakah 6-3, 6-2, in hnehna a chang.

Kum 33 mi Nadal hian Australian Open quarterfinal-a a chak loh hnuah inelna a hmachhawn leh chauh a ni a, a khel ṭha nghal hle; Mexico-a inelna neihah hian match nga khelin set a hloh miah lo. Tennis a khelh hun chhunga nomawi 85 chawi tawh Nadal chuan, "Inelna tir aṭanga a tawp thlengin ka khel ṭha em em a, hetiang baka ṭha hian tournament a hmachhawn theih loh, lawmna tur hlir a ni.

"Acapulco hi tennis a khelh ṭan tirh lama nomawi lian ka chawi hmasakna hmun a ni a, season 15 a liam hnuah hlawhtlinna ka la chang zel thei hi ka lawmna ti zualtu a ni," tiin a sawi. Grand Slam vawi 19 cham­pion tawh Nadal-a'n Mexican Open title a lak hmasak ber chu 2005 daih tawh kha a ni a, a hun lai chuan clay court a ni. Hard court-a an thlak hnuah pawh 2013 khan nomawi a chawi leh a, tunah chuan a lungthu kim nan a hlawhtling. World number 35 Fritz-a'n Nadal a hmachhawnna hmasa ber a ni a, American tlangval hian ATP Tour final a vawi nga khelhna niin tawnhriat nei ṭha ve tawh mah se a khingpui lakah tih theih a nei lo.

Kum 22 mi Fritz chuan, "Rafa hi chu tennis player awm tawha ṭha leh ropui berte zinga mi a ni, ka lakah chuan chutiang a nihna chu a lantir. Ka inelna ngainat leh khelh nuam tihna tak ni mah se world number 2 lakah chuan ka theih tawk a la tlem," a ti. Mexico Open-ah hian David Ferrer leh Thomas Muster ten tun hmain nomawi vawi thum an lo chawi tawh, tunah chuan Nadal hian an hnung zuiin vawi thum champion thei player pathumna a ni ta chiah.