China player an fihlim

Coronavirus vangin China ram a buai a, an rama badminton player-te pawhin harsatna an tawk. Europe lama inelna hmachhawn tur pawhin endikna an paltlang phawt a ngai, tun hnaia Chinese player endik ho chu an fihlim.

Nipui laiin Tokyo Olympic neih a ni dawn, qualifier khelh lai a nih avangin player tan tournament hmachawn hnem a pawimawh. Tunah hian German Open, All England Open leh Swiss Open te chu khelh hmabak langsar an ni.

Chinese Badminton Association chuan, "Coronavirus vang hian kan player tam takin harsatna an tawk, inelna ṭhenkhat kan thlen tur chu ṭhulh a ni a, a hun sawn hlat a awm bawk. Tunah hian inelna lian pathum hmachhawn duh player endikte erawh hri leng lakah an fihlim," an ti.

Olympic champion Chen Long leh Shi Yuqi te bakah veteran Lin Dan chu Germany Open leh All England khel tur zingah an tel, inelna lian pahnihah hian hmeichhe world number 1 Chen Yufei pawh a inlan ang.