Mizo Sniper-in a kap fuh ta!

Mizo tlangval Jeje Lalpekhlua'n a career-ah hun harsa tak a tawn hnuin 'The Mizo Sniper' tia hminglem an pek chu a thlen dik tir leh ta a, Bengaluru FC lakah goal khungin a team chu 2-1 in hnehna a chanpui. 

Tun season ṭan hmaa Indian Super League-a goal khung hnem ber Jeje hian beisei a phak loh avangin ISL-a Indian goal khung hnem ber a nihna chu Sunil Chhetri chuan a tlanpel hman a, tunah erawh goal a khung ve leh ta. 

Captain armband nena inlan Jeje hian minute 32-naah goal hmahruai a khung a, league match 12 zet goal a khung loh hnua a goal hmasa ber a ni. Chennai club hian minute 43-naah Gregory Nelson hmangin an goal hnihna an khung leh a, he goal hi Laldinliana Renthleiin a siamsak a ni. 

Chhinga Veng aṭanga Chennaiyin lamin an lei chhuah Dinliana hi Emerging Player of the Match-ah thlan a ni a, Winning Pass of the Match lawmman a dawng bawk. 

Bengaluru tan hian Sunil Chhetri chuan goal khat khung ve mah se a team a 'comeback' pui zo lo a, Chennaiyin lamin tun season-a a vawi hnih nan hnehna an chang ve ta.

Chennai club tan Jeje leh Dinliana bakah Zohmingliana Ralte chuan inkhel bul a ṭan a, Bengaluru tan bench aṭangin Edmund Lalrindika chu luhtir a ni bawk.