Olympic qualifier-ah Jeremy che ṭha

Jeremy Lalrinnunga chuan nimin khan 2020 Tokyo Olympic a inlan tumin qualifier bul a ṭan a, 2019 EGAT's Cup International Championship-ah inlanin pahnihna a ni a, silver medal dawngin Indonesia tlangval Deni chiah a tluk lo.

Inelna hi Chiang Mai, Thailand-ah neih niin, Mizo weightlifter Jeremy hi 67kg-ah a inlan; snatch (131kg) leh clean & jerk (157kg), total-ah 288kg chawiin senior huanga inelna a hmachhawn hmasak berah a ṭha nghal hle. Pakhatna dinhmun luahtu Indonesia tlangval Deni-a hian a pumpuiah 303kg a chawi.

Govt. Complex rawlthar hian nikum khan India infiammi zinga a hmasa ber turin Youth Olympic-ah gold medal a la, Argentina-a an inlan ṭum hian 62kg category-ah a inlan. Senior huangah Jeremy hian tun hmain a la khel ngai lo, mahse an category bikah hian India senior player zingah a record tluk an awm loh avangin Indian Weightlifting Federation chuan a thlang Tokyo 2020 Olympic-a inlan phak tur hian kawng zawh tur a la thui hle, tling tur chuan championship paruk tal an khelh a ngai dawn. Category hrang hrangah 2020 April 30 a chhutin, ranking sang 14 chin an inlan phak dawn. Weightlifter pariat chu ranking sang pariat an ni dawn a, panga chu khawmualpui bik ranking sang leh, hmun ruak dang pakhat chu a thlengtu emaw sawm bik ram aṭangin a ni ang.

India tan junior leh youth huanga medal tam tak la tawh Jeremy chuan, "A bul kan ṭan chho chauh a ni a, hmabak a la tam hle. Pakhatna nih ka duh a, mahse tun ṭumah chuan pahnihnaah lungawi a ngai, senior bika ka khelh hmasakna ber a nih avangin ka thlen chinah ka lawm tho.

"India-a kan rawn kir hunah nasa lehzualin inbuatsaihna kan nei chhunzawm ang a, April thla a inelna dang kan hmachhawn leh hunah pawh fit ṭha taka ka inlan theih nan ka thawkrim chhunzawm ang," tiin Vanglaini a hrilh.