Santosh Trophy-ah West Bengal an tla

India ram state te tana football inelna lian ber Santosh Trophy-ah sulhnu nei ṭha ber West Bengal chuan final round an thleng zo lo. Bengal hi West Zone group B-ah Sikkim leh Bihar nen an awm ho a, goal difference-ah Sikkim an tluk lo.

West Bengal hian nikum khan final lutin penalty-ah Kerala an hneh lo a, hemi hma kum hian an champion. Hei chauh hi a ni lo a, West Bengal hian Santosh Trophy-ah vawi 45 final an lut tawh a, vawi 32 nomawi chawi tawhin record an nei ṭha lawr lak.

Bhilai, Chhattisgarh-a qualifying round khelhah hian West Bengal-in an match hmasa berah Bihar chu 1-0 chauhin an hneh a, Sikkim-in Bihar hi 4-1 in an hneh thung.

Nilaini khan group match hnuhnung ber khelh a ni a, Sikkim hian Sonam Bhutia hmangin minute 12-na lekah hma an hruai a, Arijeet Singh hmangin Bengal-in first half-ah vek sut mah se goal dang a lut tawh lo.

 Group khat aṭangin team khat chiah luh tur a nih avangin final round-ah west Bengal tan hmun a awm lo.

Final round-ah hian team 10 tan chiah hmun a awm a, tun dinhmunah hian Sikkim bakah Odisha leh Karnataka te chu an tling tawh.

Tla tawh zingah West Bengal chu hming langsar ber an ni a, Tamil Nadu pawhin Karnataka an tluk loh avangin final round an khel dawn lo. Team ṭha Services leh Kerala dinhmun pawh a chiang lo a, group khata an awm avangin pakhat zawk hi chu an tel dawn lo chiang a, nizan inkhel result a zirin an pahnih an tla thei bawk.

North East Zone qualifying round chu Aizawlah February 11-16 inkar hian khelh a ni dawn a, 2014 champion Mizoram chu Meghalaya leh Tripura nen group khatah an awm.

February 11-ah Mizoram hian an match hmasa berah Tripura an hmachhawn dawn, February 15-ah Meghalaya nen group match hnuhnung ber an khel dawn. 

Mizoram hi qualifying round thlengtu an nih avang leh tun hnai record thlirin final round lut thei tura ngaih an ni a, chutih rualin West Bengal meuh pawh an tlin loh avangin vanduai thei an ni. Team ṭha Meghalaya an hmachhawn dawn a, Mizo mipui ṭawiawmna an mamawh ang.