Premier League hmahruaitu nih inchuh. Champions League hmunruak inchuh. Liverpool - Man City Vs Chelsea - Man Utd

Liverpool-in an la lâk Premier League nomawi la turin zanin dar 8:30 hian AFC Bournemouth an hneh ngei a ṭul a, hnehna an chang an nih chuan khelh zat inangah league hmahruaitu an ni dawn. 

Anfield-ah eng result pawh awm se football ngainatute mit fukna tur chu Etihad Stadium lam a ni dawn a, Pathianni zan dar 9:30 hian Manchester City leh Chelsea an inkhel dawn.

Premier League nomawi inchuhna boruak a san ang thoin season thara Champions League hmunruak inchuhna boruak a sang. London club Chelsea hi palina an ni mek a, amaherawhchu Manchester United-in zanin dar 6:00-a Fulham an hneh chuan Ole Gunnar Solskjaer-a hote hi palina dinhmun an hauh lailawk ang.

Liverpool-in match hnuhnung pahnihah Leicester City leh West Ham te nen 1-1 ve ve in an inhnehtawk a, point li lai hloh mah se zanina Anfield an luh hunah chuan ṭum dang zawng aiin an hla pui 'You'll Never Walk Alone' an sa ring ang.

Reds ṭantute hi club supporter zinga rinawm leh ruh ber zinga mi an ni a, Anfield stadium-a ṭantute ruhkawl ṭhutna 'Spion Kop' chu Liverpool chakna thahrui pakhat an ni. 

Jurgen Klopp-a hote hian league nomawi an chawi thei a nih chuan sum leh pai bakah Pep Guardiola thluak hmanga inchhek lian mek Manchester City ropui laiin an champion dawn tihna a ni a, Premier League nomawi hlu bik a ni dawn.

Reds tana thu lawmawm chu Trent Alexander-Arnold, Jordan Henderson leh Georginio Wijnaldum ten training an zawm leh tawh a, Bournemouth lakah point thum an hlawhchhuah ngei a rinawm. 

Cherries erawhin forward Callum Wilson leh midfielder David Brooks te an chhawr thei dawn lo a, thil thlen dan thlirin Klopp-a hote dinhmun a ṭha hle.

Liverpool hi a vawi khat nana Premier League nomawi chawi thei dinhmunah an ding a, hemi avang hian pressure nasa tak nei anga sawi ni mah se, Reds keeper Alisson chuan, "League nomawi kan chawi theih hi kan ring," tiin a sawi.

Pathianni zana City leh Chelsea inkhel tur hi inkhel hmuhnawm bik a ni dawn a, an match hnuhnung bera hnehna an chan ve ve avang te, League Cup final-a an inhmachhawn dawn avang te, player nei ṭha ve ve an nih avangtein en a châkawm hle.

Argentine forward Sergio Aguero leh Gonzalo Higuain te hi ngaihven hlawh tur an ni a, Aguero hian London club tho Arsenal lakah hattrick a siam thei a, Higuain hian Huddersfield 5-1 a an hneh ṭumin  goal hnih a khung thung.

Player ṭha pahnih hi Argentina tan an khel dun meuh lo a, khelhna hmun an inchuh tlangpui a, Lionel Messi ropuinain an thiamna hi a hliahkhung. Amaherawhchu club level-ah erawh legend ve ve an ni. European club tan Aguero hian league match 403-ah goal 231 a khung a, Higuain hian match 423-ah goal 226 a khung a, an goal khung hian an thiamna hi a pholang chiang hle.

Chutihrualin Etihad Stadium-a inbeihna erawh player mal inbeihna ni loin Pep Guardiola leh Maurizio Sarri te inbeihna a ni dawn a, 'Tiki-taka vs Sarri-ball' tih te pawhin a sawi theih ang. FA Community Shield-a an intawn ṭumah Aguero goal hnih hmangin Man City an chak a, Stamford Bridge-a league match-ah N'Golo Kante leh David Luiz hmangin Chelsea 2-0 in an chak thung.

Pep-a khelhtir dan 'hmuhnawm loh' ti chi tan chuan ball an inpe kual nasa lutuk hi 'ninawm' a tling a, Sarri naute pawh an danglam lo. Amaherawhchu zanin inkhel tur hi chu a danglam dawn, a chhan chu City-in pakhatna dinhmun an hloh thei a, Chelsea pawh Europa League khel pha chinah an tla thei a, loh theih loin attacking game an khelh a ṭul ang.

Tottenham Hotpur-in nipui leh thlasik bazar-a player an lak loh bakah stadium sa mek chungin Premier League nomawi an beisei pha a, hmahruaitu an phak lohna hi point nga chauh a ni. 

Mauricio Pochettino hote hian Pathianni zan dar 7:00-ah Leicester City an mikhual dawn a, Spurs hi Argentine manager hnuaiah che ṭha viau mah se nomawi an la chawi lo. An khingpui tur Foxes erawhin Premier League nomawi an chawi tawh a, chuvangin Harry Kane leh Delle Alli te tel loa khel tur Spurs hi chak chianga dah a thiang lo.

Manchester United-in manager lai lawk Ole Gunnar Solskjaer hnuaiah nasa takin hma an sawn a, zanina Fulham an hneh a nih chuan palinaah an awm dawn.

Norwegian manager chuan, "Kan hmabak zel hi a pawimawh chu a ni a, Fulham nena kan inkhel tur hi a pawimawh zia kan hre tur a ni," tiin a sawi.

Fulham hian an match hnuhnung berah Crystal Palace 2-0 in an hneh lo a, table-ah 19-na daih ni mah se inkhelhna hmun hi Craven Cottage a ni a, Claudio Ranieri hnuaia khel an nih bawk avangin eng result pawh a thleng thei ang.