Valencia an vannei leh tawh!

Vanneihnain Valencia a kiansan thei lo - Copa del Rey semifinal first leg-ah an chak dawn lo nia a lan hnuah injury time-ah goal khat an khung a, khualmualah draw result an hlawh chhuak. 

Valencia hi quarter­final-ah pawh an lo vannei tawh - first leg-ah Getafe laka 1-0 a an tlawm hnuin second leg-ah 3-1 in an chak let a, heta an goal hnih hi injury time-a an khung a ni!

Ningani zanah pawh Real Betis hian minute 54 chhungin Loren Moron leh Joaquin goal khung hmangin 2-0 in hma an hruai hman a, kum 37 mi Joaquin hian corner aṭangin 'direct' in a pet goal.

Mahse, Valencia an beidawng lo. Russian forward  Denis Cheryshev chuan minute 70-naah si phurh a sut ṭhen a, Kevin Gameiro chuan injury time-ah si phurh a sut zo - Betis an reh ṭhup a, Valencia an sapatal.

Copa del Rey semifinal second leg khelh tur la awm mah se khualmuala goal hnih khung Valencia hi dinhmun ṭha zawk an ni nghal.