Madrid derby - Zaninah khelh a ni dawn

Spanish football-a inkhel boruak 'hot' ber pawla chhal ni reng Madrid derby chu zanin dar 8:45 hian khelh a ni dawn a, Atletico Madrid-in La Liga-ah Real Madrid an mikhual ang. 

Champion beisei thei tawh lo ang hiala sawi hlawh hman Real Madrid hian hnehna an chang a nih ngat chuan pahnih­na aṭanga Atletico phet thlain Barca hnuai chiahah an awm dawn tihna a ni - 'champion' an sawi ri ve leh ngam ang. 

Club lian pahnih an inhma­chhawn dawn reng rengin player mit fuk bikna an awm ṭhin a, khaikhin loh an harsa ṭhin. Zanina Atletico leh Real inkhel tura khaikhin hlawh ber chu Antoine Griezmann leh Karim Benzema te an ni. 

French striker pahnih hian tun season La Liga-ah goal 10 ve  ve khung tawhin tlarhma player zinga hmuhnawm ber pawl an ni mek. Griezmann hian inelna hrang hrangah goal 16 a khung tawh a, Benzema hian game ngaa khel tam zawk chungin goal 18 a khung tawh thung. 

Atletico Madrid hian striker thar an nei bawk a, a hming chu Alvaro Morata a ni - Real striker hlui hian a match hmasa bera Betis lakah a team chakpui zo lo mah se amah ring ngam lotu Real Madrid lakah phuba lak chaknain a khah ngei a rinawm a, zaninah goal khung a tum dawn tih a chiang. 

Morata hian Real mai ni lo Chelsea lama amah sawiseltute pawh khelmual chhungah chhan a chak dawn tih a chiang reng a, Spain international striker hian en bik a hlawh ang. 

Real Madrid-in lawmna thar an nei a, an lawmna hi a hming chu Vinicius Junior a ni. Kum 18 mi forward hi pound maktaduai 38.7-a an lakluh kha a ni a, coach ban tak Julen Lopetegui khan minute 17 bak a chhawr lo. 

Mahse, reserve team lama amah hrechiangtu Santiago Solari-a'n senior team a enkawl hnuah a chhawr zui a, a tisual lo - Flamengo forward hlui hian tun season-ah goal li a khung der tawh a, Benzema nen goal hmaah an in 'man' em em bawk.