Man City-in Santiago Bernabeu tlawh dawn

Manchester City hi hrem vangin season hnih chhung Champions League khel thei lo dinhmunah an ding a, hremna hi a kaltlang a nih chuan Pep Guardiola-a'n Europe-a English club champion pui turin turin tun season chauh a nei tiin a sawi theih. Guardiola hoten zanin dar 1:30 hian Santiago Bernabeu an tlawh dawn a, an khingpui tur hi Champions League-a sulhnu nei ṭha ber Real Madrid an ni.

UEFA-in Manchester City hremna an ti chhuak tawh chungin Pep Guardiola hian club tana a rinawm tur thu a sawi a, amaherawhchu Spanish manager hian, "Thil thleng tur ang chu a thleng tawh a, mah se a la tawp lo. Club-in thuneitu sang zawk hnenah an thlen dawn a, dikna hmu turin a tawp thlengin a bei ang," tiin a sawi.

Spanish manager hian nikum khan kum 2021 thleng atan contract a pawtsei a, chutihrualin an inremnaah hian club-in a tih tur angte a tih loh chuan club chhuahsan theih dan an ziak tel. Guardiola hian a rinawm tur thu a sawi rualin club hotuten tihsual an nei lo tih an hrilh thu a sawi tel zel. Man City-in hremna an hmachhawn tak tak a nih chuan Pep hian club hi thu dik lo hrilhtuah puhin chhuahsan a hreh loh ringtu an tam hle.

Man City hotute erawhin Guardiola hi a contract neih lai hmang zo turin ring mah se a ziah belh erawh a rinawm chuang lo. 

Pep Guardiola-a'n Barcelona a enkawl laiin Champions League nomawi vawi hnih a chawi a, hemi hnu hian Europe-ah a champion tawh lo. Catalan club a enkawl hnuhnun berin semifinal-ah Chelsea an hneh lo a, season khat a awl hnuah kum 2013 aṭangin Bayern Munich a enkawl a, Bundesliga-ah che ropui mah se Champions League-ah final a thlenpui lo.

Bavarians hian Pep-a hnuaia semifinal hmasa berah Real Madrid chu aggregate-ah 5-0 ngawtin a hneh lo a, Barcelona (5-3) leh Atletico Madrid (2-2, away goal rule) te a hneh lo chhunzawm. Spanish manager hian hlawhtling takin Bayern Munich enkawl mah se Champions League nomawi a chawi loh avangin a hlawhchhamah an ngai.

Man City-ah pawh Guardiola tehna tur chu Champions League tho a ni a, 2016-17 season-ah away goal rule hmangin last 16-ah Monaco an hneh lo. 2017-18 season-ah quarterfinal thlengin Liverpool lakah 5-1 zetin an tlawm a, season liam ta khan away goal rule hmangin semifinal-ah Tottenham hneh loin a tla. Guardiola hian Champions League a lak urhsunna lamah league lama an hnuaia awm pawh a hneh lo leh ṭhin.

Guardiola-a'n Champions League a ngaihhlutzia a sawi fo a, Manchester City-in Spanish manager an lakluh chhanah  Europe-a nomawi chawi an duh vang a tih theih. Zanin hian Europe-a roreltu Real Madrid lakah City fiahin an awm dawn.

French manager Zinedine Zidane erawh Real Madrid a enkawl ṭantirh aṭangin vanneihnain a vur a, season hnih leh a chanve chhungin Champions League nomawi pathum a chawi der. Season liam ta khan Zidane hian chawlh a la a, round of 16-ah Ajax hneh loin Real Madrid an tla.

Real Madrid tlak chhiat chhanah hian Zidane vang ti tawk an awm laiin Cristiano Ronaldo awm loh a langsar zawk. Zidane hian Ronaldo aiin huhang a ngah tih pholan a duh a nih chuan Man City laka tlawm a, round of 16-a tlak a rem lo.

Amaherawhchu Real Madrid hian tun hnaiah beisei an pha lo. Copa del Rey-ah Real Sociedad hneh loin an tla a, hemi hnu hian La Liga match thumah vawi khat chauh chakin Barcelona hnuaiah an awm. Los Blancos harsatna belhchhah turin player manto Eden Hazard a khel thei dawn lo a, Marco Asensio pawh match fitness a neih loh avangin a inlan thei lo ang.