BCA tana inlan tur Malik Prince- Martin
Basketball inelna sang ber NBA draft zinga tel tawh, 6ft 11in zeta sang Malik Prince-Martin chuan Mizoram Super League a khel dawn. United States tlangval hi Zarkawt BCA tan a inlan ang, zanin dar 6:30-ah team thar Ramhlun Sporting Club nen an inkhel dawn.
Nizan khan Altro MSL hi Hawla Indoor Stadium-ah khelh ṭan a ni tawh, zanin inkhel tur hi champion lai BCA an nih bakah Prince-Martin a inlan dawn avangin fans an tam ang - inkhel en man Rs 50 a ni a, a hmuna kal thei lo tan Zonet chuan live-in a pe chhuak dawn a ni.
BCA an ṭha
MSL season hnuhnung pahnihah Zarkawt BCA an champion a, kuminah pawh rinkai an ni. Tualchhung player ṭha, Most Valuable Player nilai Lalrina Renthlei leh Zonunsanga te awmna an nih avangin rin an hlawh - Malik Prince-Martin hi eng ang taka ṭha nge tih chu kan hmu thuai dawn.
BCA coach Lalruatfela chuan, "Kevin Durant khelh dan leh Martin khelh dan hi a inang deuh, ball a keng thei hle. 3-Points a vawm lut thei viau a, a thiam bakah a hmuhnawm tel bawk," tiin a player lakah beisei an neih san thu Vanglaini a hrilh.
Kum 25 mi Martin hi February 23, Pathianni khan a rawn thleng tawh;
ṭha takin team training pawh a zawm tawh. Afela chuan, "Time Zone inan loh vangin a tirah chuan a nunphung a buai ve deuh, mahse hun rei lote chhungin a insiamrem hman ang," a ti.
Mizo hlang
Ramhlun Sporting Club hian Brazilian tlangval Matheus Cesar Figueiredo lak an tum a, mahse hun tepter tawh takah thil an ti fel thei lo. Tualchhung basketball inelna sang ber an khelh hmasa berah hian Mizo player hlangin an khel dawn.
Ramhlun hian MSL playoff-ah Zarkawt Serpents an hneh a, inelna taka an bul ṭanna tur pawh Zarkawt club tho an ni; an player neih dan chhutin an dinhmun erawh a inthlau deuh ang - RSC lam innghahna tur chu thawhhona ṭha a ni.
RSC manager Aris Vanneihtluanga chuan, "Inbuatsaihna kan nei ṭha, player an fit em em vek," tiin Vanglaini a hrilh. Tualchhung basketball lama tawnhriat nei coach Liansangpuia kaihhruai team hian semifinal thlen an duh a nih chuan a tir aṭanga thapui an thawh a ngai dawn.