Manchester City 6-0 Chelsea Pep-a hoten Sarri ball an pet puak

Premier League champion lai Man-chester City chuan Chelsea 6-0 zeta sawpin league hmahruaitu an ni. 

Table aṭanga thlir chuan Pep Guardiola hote hi Liverpool aia match khata khel tamin goal difference hmangin hmahruaitu an ni hram hram a, amaherawhchu khelmualah erawh champion nawn tur khelhin an khel thung.

Pathianni zan khan Etihad Stadium-ah City-in Chelsea inkhelh an zirtir a, English club lian pahnih inkhel ni mah se puitling leh naupang inkhel ang mai niin an inchai tawk lo.

Argentine forward Sergio Aguero chuan hattrick a siam a, Premier League-a vawi 11 hattrick a siamna niin Alan Shearer-a record a tluk chiah.

City tan hian Raheem Sterling-a'n goal hnih khungin Ilkay Gundogan-a'n goal khat a khung ve bawk. Chelsea mualphona hi a len tham avangin Italian manager Maurizio Sarri dinhmun a derthawng nghal.

City-in an khelh ṭhat ber zan an tawng a, minute lina lekah Raheem Sterling-a'n goal hmahruai a khung. 

Goal hnihna khung theihna hun ṭha chu guero-a'n hnai set sawt aṭangin a hlah a, Argentine forward hian a chesual palh ve tih lantir nan minute 13-naah yard 25 aṭangin goal kilah tak a khung.

City phurna belhchhah turin Chelsea midfielder Ross Barkley-a'n Aguero goal khung tur a siamsak a, English midfielder pawi khawih vang hian Blues tan thawhchhuah chi rual a ni tawh lo.

Pep-a hote goal khung châkin an la ril ṭam reng a, an khawih apiang 'rangkachakah' a chang an tih ang mai hi niin Gundogan chuan minute 25-naah goal lina a khung belh.

Second half-ah pawh City an vul zel a, minute 56-naah Sterling-a penalty hlawhchhuah chu Aguero-a'n hattrick siam nan a hmang a, khawvel keeper manto ber Kepa Arrizabalaga chuan goal ven hna bakah ball chhar hna a neih belh!

 Minute 10 khelh hmabak a la awm tihin City-in mawi zetin Chelsea tlarhnung an ṭhiat a, Sterling-a'n a tawp a khar a, Pep Guardiola hote goal chhuah loha goal ruk an khungna club hi Eden Hazard leh Gonzalo Higuain te khelhna a ni.

Inkhelh banah Manchester City boss Pep chuan chibai turin Chelsea manager Sarri a pan a, Italian manager hi a kaltlang. He mi chungchang hi sawiin Sarri chuan, "Ka hmuh loh vang a ni a, inhmuh thiam lohna kan nei lo," tiin a sawifiah.

Pep Guardiola pawhin, "Gianfranco Zola (assistant manager) nen kan inbia a, min hmu lo a ni. Buaina kan nei lo," tiin a sawi ve bawk.

Chelsea ṭantuten season ṭantira an sawi vul 'Sarri ball' chu eng ruai a ni lo a, Italian manager mi rin Jorginho pawh eng ruai a ni lo. FIFA World Cup meuha France champion puitu N'Golo Kanté pawh a khelhna hmun ni loa a khelh phah bawk avangin Sarri hian a thlir sual tia ngaitu an tam hle.

Sarri chuan, "City hmaah khan Sarri ball hmuh tur a awm lo, a hlawhchham tih theih a la ni lo. Kan player-te rilru put hmang dik loh vang lam a ni lo a, hun pawimawhah kan tisual a, City an khel ṭha hrim hrim," tiin a insawifiah.

Amaherawhchu Chelsea-in an match hnuhnung bera an sawp Huddersfield chu table mawngphaha awm an ni a, hemi hma hian Bournemouth lakah goal li zetin an tlawm. Liverpool legend Jamie Carragher chuan, "Sarri hian Chelsea hi Arsenal ang maiah a chhuah a ni," tiin a sawi a, nomawi chuha an elpui tur laka goal an chhuah vak chu a hrethiam lo.

London club hi April 1991 khan Nottingham Forest chuan 7-0 zetin an sawp a, tun ṭum hi hemi hnua an chak loh nasat ber ṭum niin Sarri hnuaiah insiamṭhat aiin hniam lam an pan em tih chu club thuneitute ngaihtuah tur a ni.

Eithad Stadium-a inkhel hi Liverpool leh Manchester United lamin an ngaichang ve reng a, Chelsea ang thoin Kop-in pawi an ti a, United ṭantute an hlim thung.

Ole Gunnar Solskjaer kaihhruai Man United chu khelh zat inangah palina an ni a, Jose Mourinho-a'n Champions League khel pha turin 'thilmak' a ngai ti mah se Norwegian manager hnuaiah chuan thil theih niin a lang. Chutihrualin Chelsea-in goal an chhuah tam avangin Arsenal-in pangana dinhmun an luah a, Champions League khelh tum inchuh boruak a san phah hle.

Khawvelin a ngaihven zawk erawh champion tur zawnna a ni a, Reds player hlui Graeme Souness chuan, "Liverpool-in nomawi an chawi dawn a nih chuan an chak vek a ngai tawh," tiin Jurgen Klopp-a hote chu pressure ngah zawk an nih thu a sawi.

FA Cup vanga an chawlh hnua league match hmasa berah Liverpool-in Manchester United hmachhawn turin Old Trafford an tlawh dawn a, Souness thlirna aṭang chuan Reds tan point hloh a thiang lo.

Man City thiampuipa Kevin De Bruyne a dam tawh a, Aguero a hriam bawk avangin Pep Guardiola hote hian point hloh theihna tura ngaih Arsenal leh Chelsea lakah an thiam zia an lantir ta daih a, Graeme Souness thlirna hi a ṭawmpuiawm hle.