Santosh Trophy Goal thumin Meghalaya an chak

Santosh Trophy qualifying round - North East Zone chu nimin khan Lammualah khelh ṭan a ni a, Mizoram awmna group-a awm Meghalaya chuan Tripura 3-0 in an hneh.

Inelna thlengtu Mizoram hian February 13, Nilaini hian Tripura hi an hmachhawn ve ang.

Group A-ah Mizoram elpui ber tura ngaih chu Meghalaya an ni a, niminah a dikna hmuhin a awm. Minute 11-naah Donlad Diengdoh chuan Tripura lama Meghalaya goal hmahruai a tauh lut a, captain Brolington Warlarpih chuan halfway line pelh hret aṭangin minute 42-naah a khung belh bawk.

aṭanga minute riatna lekah Donlad Diengdoh chuan a through ball hmuh ṭha tak chu Meghalaya goal thumna atan a khung a, darkar chanve chuang la khel mah se goal dang a luh belh tawh lo.

Mizoram leh Meghalaya te hi Zirtawpni hian an khel dawn a, Mizoram hian dinhmun ṭha zawka awm an duh a nih chuan Nilaini tlaiah goal thum aia tama Tripura an hneh a ṭul ang.

Vawiin hian group B an inlan dawn a, tlai dar 2:00-ah Manipur leh Arunchal Pradesh te an inhmachhawn dawn. 

He group-a awm tur Nagaland an rawn inlan loh avangin group A ang thoin team pathum an inel ang a, pakhat tan chauh final round-ah hmun a awm dawn.

Santosh Trophy final round-ah hian India ram pumah team 10 an tling dawn a; Odisha, Sikkim, Karnataka leh Services te an tling tawh a ni.

Champion ngun ber West Bengal bakah Kerala leh Tamil Nadu te chu tla langsar zual an ni.