Zaninah Man United-in Old Trafford-ah PSG mikhual dawn

UEFA Champions League knockout stage kan nghak chhuak ta. Zanin inkhel pahnih awm turah dar 1:30-a Manchester United leh Paris Saint Germain inkhel tur chuan ngaihven a hlawh hle.

Last 16 inhmachhawn tur pawh a nih lai hian English club hi Jose Mourinho-a'n a enkawl a, French champion buk a rit zawk. Amaherawhchu Ole Gunnar Solskjaer hnuaiah Man United hi match 11-ah vawi 10 an chak a, hliam vanga PSG an buai bawk avangin first leg bikah chuan rinkai zawk an ni tawh.

PSG hian kartawp khan Bordeaux chu Edison Cavani goal hmangin 1-0 in an hneh a, hliam vangin Uruguayan striker hian second half a khel lo. Manager Thomas Tuchel chuan, "Game plan chi hrang hrang a awm zel. Neymar kan chan hnuah Marco Verratti kan chan a, tunah Edison Cavani a inhliam leh takah chuan Plan B kan thlir thei tawh lo - Plan D a ngai tawh," tiin an ṭhat dan bera an inlan loh tur thu a sawi a, heng bakah hian right back Thomas Meunier a tel thei dawn lo bawk.

Chutihrualin Cavani hi khel ta lo pawh ni se PSG hian Old Trafford hrechiang Angel di Maria, Kylian Mbappe, Julian Draxler te goal nawr turin an la kawl a, tlarhnungah  Brazilian defender ṭha Thiago Silva an kawl a, team uap turin veteran keeper Gianluigi Buffon te an kawl a, dah hniam theih an ni lo.

PSG hi last 16 lut turin Liverpool chungah an awm a, Jurgen Klopp-a naute ai hian an ṭha zawk tih nemngheh nan inkhel pawimawhah 2-1 in an hneh. French champion hi Ligue 1 thununtu nih ringawtah an lungawi tawh lo a, European champion nih chu an duh ber a ni a, second leg hre chungin Old Trafford an lut ang.

Manchester United manager lailawk Ole Gunnar Solskjaer chuan, "Team ṭha kan hmachhawna kan tum châk chu an player-te an ni a, mipuiin player ṭha hmuh an duh a, Old Trafford tan chanchin ṭha a ni lo. Ka inkhelh hun lai khan Real Madrid nen khan kan intum ve ṭhin a, Old Trafford-a Ronaldo leh Figo te an rawn kal kha chuan boruak a dang daih a ni. Vanduai thlak takin Neymar a inhliam a, pawi kan titakzet a, chutihrualin kan right back chuan pawi a ti hran lo ang," tiin PSG harsatna tawh mek chu pawi a tih thu a sawi.

Norwegian manager Solskjaer hian PSG inkhel zirchiang tur hian France-ah zinin Lyon an hneh loh lai chu a hmun ngeiah a en a, amaherawhchu United manager hian a dah hniam phah lo. Solskjaer chuan, "French league hi dah hniam theih a ni lo a, Lyon laka an chak loh avangin kan khingpui tur hi an chhiat phah lo. Keini pawh inkhel turin kan inpeih tawh ang bawkin anni pawh an inpeih ang," tiin a sawi.

United hian Fulham 3-0 an hneh ṭumin Marcus Rashford an hahchawlhtir bakah Paul Pobga leh Ander Herrera te an la chhuak hma a, Anthony Martial-a'n a theihna tak a phochhuah leh tawh bawk avangin Solsjkaer-a hote hian inhliam vanga buai PSG laka hnehna an chang thei lo a nih chuan Norwegian manager hmalam hun thlengin nghawng a nei thei ang.