Juventus tan Ronaldo a thawhhlawk

Cristiano Ronaldo-a'n Juventus tan goal khat a khung bakah goal hnih dang a thawk chhuak a, Italian champion hi Sassuolo lakah 3-0 a hnehna chan puiin, Serie A table-ah an­mah­ni hnaih bertu Napoli aiin point 11 ngawtin an sang fal ta.

Pathianni zan league match inkhel dangah AC Milan chuan an mikhual Cagliari 3-0 in an hneh ve bawk a, Gennaro Gattuso naute hian season thara Champions League khelh an beiseina an chhawmnung zel, pangana niin an chunga awm Inter Milan nen an inkarah point li chiah a awm tawh a ni.

Mapei Stadium-a inkhelah mikhual Juventus lamin a tir aṭangin inkhel an thunun chhuak vek, Ronaldo-a goal shot ṭha zet chu Sassuolo keeper Andrea Consigli-a'n dan sak mah se a per let chu Sami Khedira chuan chiang zetin a khung. 

Portugal international hian second half-ah Miralem Pjanic-a corner pet a tauh lut a, Real Madrid forward hlui hian bench aṭanga rawn lut Liverpool midfielder hlui Emre Can khung tur a siamsak leh bawk - Germany international Can hian ball a khawih hmasak berah a khung a ni.

Kum 34 mi Ronaldo goal khung pakhat chu offside vangin pawm sak a ni lo, hetichung hian Serie A season a hman hmasak berah goal 18 khung tawhin top scorer a ni mek; Turin club tan hian inelna hrang hrangah match 31 a khelh aṭangin goal 20 a khung sak leh der tawh.

Hnehna changin goal chhuah lo mah se Juventus hian an chak danah an vannei tih an pawm. Minute 15-na lekah Sassuolo midfielder Manuel Locatelli chuan box chhungah ṭha zetin ball lalut mah se Wojciech Szczesny-a'n penalty chawi si loin ball a chhuhsak thei a, VAR hmanga ennawn a nih hnuah pawh Juve keeper hi hrem a ni lo.

Second half-ah si khat chauha hma an hruai laiin Sassuolo lamin sut theihna hun ṭha an nei leh, counter attack aṭanga an goal nawr pet chhuak tura tlan chuak Szczesny a talbuai, Poland international hian a pet chhuah fuh tawk loh avangin Domenico Berardi-a'n hla deuh tak aṭangin goal ruak a khung ṭhelh - lut ni se boruak a danglam thei ang.

Goal an hum theih avangin Juventus lamin point thum an hmu a, tun season league match 23 an khelh tawh zinga 20 ngawtah hnehna an chang thei, ṭum thum chu an khingpuite nen an inhnehtawk - a zawna a vawi riat nan an champion leh ngei a rinawm.

Juventus manager Massi­miliano Allegri chuan, "Sas­suolo hi tun season bikah chuan midfield nei khawng berte zinga mi an ni a, an inpekna a thuk em avangin hmachhawn pawh an awlsam lo hle.

"Inkhel tir lamah risk lain na takin kan nawr a, min vuak letna na tak kha Szczesny zarah kan dang thei hlauh. Ronaldo ṭangkaina leh ṭhatna sawi nawn kher a ngai lo a, Paulo Dybala, Emre Can leh Rodrigo Bentancur te pawhin match ṭha tak an khel a ni," tiin a sawi.

Tun kar chhungin Juventus hian Champions League an la khel rih dawn lo a, February 21 hian Atletico Madrid an lenchilh dawn, chumi hma chuan tun kar tawp hian league match-ah Frosinone an mikhual leh phawt ang.