A zawna vawi kua chak thei Lazio

Lazio chuan an tih dan pangngaiin harsa takin hnehna an chang leh ta. Pathianni zan inkhelah Lazio hian hun tawp dawna Ciro Immobile goal khung hmangin player 10 a khel Brescia 2-1 in an hneh a, Italian football inelna sang ber Serie A match kua chu a zawnin hnehna an chang tawh.

Biancocelesti (Lazio sawina) hian kum 2019 kha an khar ṭha hle, a zawnin league match vawi riat an chak; thlasik chawlh neih hmain Italian Super Cup-ah Juventus hnehin nomawi an chawi bawk. Kuminah Luis Alberto leh Lucas Leiva te chu hrem vangin an chhawr thei rih lo a, midfielder Danilo Cataldi chu 100%-in a fit tawk loh avangin midfield-ah Marco Parolo leh Joaquin Correa te an awm a ngai, anni pahnih hian an hna chu tlin takin an thawk thei tho a ni.

Stadio Mario Rigamonti-a inkhelah Lazio lamin minute sarihna lekah Felipe Caicedo hmangin goal an khung, mahse offside vanga pawm a ni lo. Mikhual Lazio-in inkhel thunun mah se mualneitu Brescia lamin minute 18-naah striker Mario Balotelli goal hmangin goal hmahruai an khung.

Minute 39-naah Brescia defender Andrea Cistana chu hnawhchhuah a ni a, penalty a chawi bawk. Immobile chuan an si phurh sut nan hmangin chawlhlawk laiin team pahnih 1-1 in an inhnehtawk.

Second half-ah player tlem zawk Brescia an ṭang rei thei a, point an hlawh chhuak ngei dawn niin a lang hman. Mahse, hun tawp hma chiah minute 90+1-ah Italian striker Immobile chuan season kal laia league goal 19-na khungin a team a chakpui.

Brescia striker Mario Balotelli chu an chak loh vangin a ngui a, fans lam aṭanga au elna an tawh avangin a thinrim bawk. Manchester City striker hlui hian Lazio fans chu an thil tih avanga zak turin a chah.

Pathianni zanah Serie A match an khelh laklawh lai hian au rinna hmangin Lazio  fans lam chu chi inthliarna lama au tawh lo turin khap an ni hial. Liverpool tan pawha khel tawh Balotelli chuan, "Stadium chhunga Lazio  fans awmte kha in zahpuiawm hle," tiin instagram lamah a sawi a, #saynotoracism tih 'hashtag' hmangin vun rawng vanga diriamna a do. Kum 29 mi Balotelli hian tun hma pawhin au nawmnah a lo tawk fo tawh. Nikum November thla mai pawh khan Hellas Verona nen an inkhelh ṭumin au nawmnah a ni a, fans lama ball a pet luih bakah khelmual chhuahsan a lo tum tawh a ni.

Champions League khelh tum zinga mi AS Roma-in kum bul an ṭan fuh lo, an mikhualna ramah Torino chu 2-0 in an ngam lo. Torino tan hian Andrea Belotti chuan goal hnih khungin a team a chakpui.

Roma an hneh hmain Torino hi an league match hnuhnung pakuaah ngawt an chak lo, goal 27 zet an chhuah bawk - kuminah erawh beiseina nen bul an ṭan fuh hle. Chak lo Roma erawh palinaah an awm rih a ngai a, an chunga awm Lazio  an phak lohna chu point li a ni ta.

Genoa chuan nikum October thla hnu lama an chak lehna hmasa ber ni turin Sassuolo 2-1 in an hneh. Domenico Criscito-a'n minute 29-naah penalty a chhuihluh chu Pedro Obiang hmangin sut mah se Pandev bawkin chakna goal a khung.