Run li lekin India an chak lo

India leh New Zealand chuan Pathianni khan T20 series la tur an zawng a, mualneitu Black Caps-in run lia hnehna changin 2-1 in series an la.

Seddon Park-ah India chu ṭhumvawrah an chak a, vawm hmasak an thlang. Amaherawhchu New Zealand opener Tim Seifert (43 runs) leh Colin Munro (72) te an che ṭha a, over 20-ah run 212 siamin wicket li chauh an hloh.

India bat hun a thleng a, Shikhar Dhawan-a'n run nga chauh a vaw chhuak a, amaherawhchu captain Rohit Sharma (38), Vijay Shankar (43), Rishabh Pant (28) leh Hardik Pandya (21) te zarah beisei nei chho zelin MS Dhoni-a'n (2) beisei a pha lo a. Dinesh Karthik (33) leh Krunal Pandya (26) te a tawpah che ṭha mah se over 20-ah wicket ruk hlohin run 208 an siam a, run liiin an phak lo.

India captain Rohit Sharma chuan, "A tawp kan thleng thei lo hi a pawi kan ti a, chutihrualin lawmna tur tam tak a awm a, insiamṭhatna tur erawh kan nei e," tiin a sawi.