Roma vs Porto: An intum tawk dawn
Champions League-a thawm nei lian tak ni lem lo AS Roma leh FC Porto chu zanin dar 1:30 hian last 16-ah an inhmachhawn dawn a, team intiat tawk tak an nih avangin inkhel a hmuhnawm ang.
Round of 16 fixture danga European club langsar tak takte thlir chuan club pahnih hi an in 'chang' hi an lawm ve vein a rinawm a, quarterfinal luh an beisei ve ve ang - hei tak hi inkhel hmuhnawmna belhchhahtu tur a ni.
Damdawi In lun
Roma boss Eusebio Di Francesco-a tan lu hai ngawih ngawihna tham khawpa tam player an inhliam a, Italian club hian an ṭhat dan berin Porto hi an lo mikhual dawn lo tih a chiang.
Tlarhnungah defender palian Konstantinos Manolas a inlan thei dawn lo a, Porto tlarhma tan hna a awlsam sawt dawn tihna a ni - Italian club-ah hian Diego Perotti, Patrik Schick, Robin Olsen leh Cengiz Under te chu an inhliam vek bawk!
Porto tan thawnthu a danglam bik lo. Winger Jesus Corona chu hrem vangin a inlan thei dawn lo a, Vincent Aboubakar leh Moussa Marega an la inhliam bawk avangin striker pangngai an neih chu Sergio Conceicao chiah a ni.
Roma ngam loh!
Thawnthu hlui keu let chuan Roma-in Porto an la ngam lo a, he record duhawm lo hi thaibo an duh ngei ang - vawi li an intawn tawhah Porto hneh an la nei lo.
Kum 1981 khan UEFA Cup Winners' Cup second round-ah an lo intawng tawh a, inkhel pahnih belhkhawmah 2-0 in Porto an chak.
2016/17 Champions League playoff-ah khan team pahnih hi an lo intawng tawh bawk a, double leg-a khelh niin inkhel pahnih belhkhawmah Porto hi 4-1 in an chak.
Chhuan loh sulhnu
Tun hnaia an inkhel aṭanga thlir tur a nih chuan Roma hian chhuan tur an nei tlem hle. Match hnuhnung pangaah vawi hnih chiah an chak a, Coppa Italia-a 1-7 a Fiorentina an ngam loh chu a langsar hle.
Porto hian chhuan tur an nei bik lo. An match hnuhnung pangaah vawi hnih chiah an chak ve tho a, an league match hnuhnung pahnihah an khingpui an draw avangin league-a an hmahruaina pawh point khat chauh a ni tawh.
Mahse, Porto hian Champions League group stage-a match rukah vawi nga chakin vawi khat an khingpui an inhnehtawkpui a, an zam lo ang.