Barca chak zo lo - La Liga boruak a nung thar

La Liga hmahruaitu Barcelona-in hnehna an chang zo lo a, an hnuai chiaha awm Real Madrid aia point ruk chiaha an san tak avangin La Liga boruak a nung thar. 

Barcelona hian Pathianni zan khan an mikhualna ramah Athletic Bilbao chu goal khung loin an inhnehtawkpui a, Inrinni zan khan Real Madrid-in Atletico an hneh bawk si avangin champion thei zingah Real thaibo theih an ni ta lo. 

Real Madrid fan-te tana thu hriat nuam tak tur chu Barcelona hi an la hmachhawn leh dawn - March 2 khian Santiago Bernabeu-ah league match khel turin Catalan club hi an mikhual dawn a, Barca tan champion chiang saa in dah a harsa ta. 

Barcelona an chak zawh loh miau avangin Atletico pawh thaibo theih an ni ta bik lo a, Real ngam lo hlim club hian point sarih chauhin Barca hi an phak lo - Catalan club hi an la hmachhawn ve leh dawn bawk. 

Barcelona tan Luis Suarez, Lionel Messi leh Philippe Coutinho ten inkhel bul an ṭan a, an squad en mai chuan Catalan club tan chak lohna chi niin a lang lo a, Athletic Bilbao tan beisei a bo nghalah a ngaih theih. 

Mahse, rin loh takin Barcelona aiin mualneitu Athletic Bilbao chu khel ṭha zawk an ni a, Marc-Andre ter Stegen awm lo se league hmahruaitu hi an mualpho ngei ang!

German keeper hian vawi hnih ngawt chu save ṭha zet mai a nei a, Markel Susaeta leh Inaki Williams-ten hun duhawm an neih chu goalkeeper class sang a ni tih pholan nan a hman sak. 

Athletic hian player kim loin inkhel an khar zui a, Spanish defender Oscar de Marcos chuan injury time-ah a kuta ball a khawih avangin yellow card pahnihna a hmu a, hnawhchhuah a ni. 

Kum 31 mi Messi-a'n ṭum dang angin Barca tan danglamna a thlen thei lo a, a hun neih ṭhat berah penalty area pawn aṭanga a pet chuan crossbar a per.

Messi hian tun season-ah goal 29 ngawt a khung tawh a, league bik ringawta a goal khung zat pawh goal 21 a tling tawh. Bilbao lakah erawh Messi 'zan' a ni lo. 

Argentine forward chauh a ni lo. Luis Suarez-a'n goal a zawng hmu thei bik lo - Barcelona-in league match 38 hnuah a vawi khat nan goal an khung lo a, goal an khung loh hnuhnung ber chu February 11, 2018-a Getafe laka an khung loh kha a ni. 

Barcelona hi league match 11 chhung a zawnin tlawm tawh lo mah se Athletic hma hian Valencia chu 2-2 in an inhnehtawkpui tawh bawk a, inelna hrang hranga an match hnuhnung parukah vawi hnih chiah an chak. 

January 2019 ṭan tirah kha chuan Real Madrid hi table-ah pangana an ni a, Barcelona an thlauhna pawh point 10 ngawt a ni a, an chungah hian Barca bakah Atletico, Sevilla leh Alaves an awm!

Hetih hunlaia Real chungchang an sawi ber chu, "Season tharah Champions League an khel ang em?" tih hi a ni a, tunah erawh champion thei an nih thu sawi a ngai leh ta - coach Santiago Solari chu fak phu a ni. 

Solari hian a thlak tak coach Julen Lopetegui-a hman duh loh Vinicius Junior a chhawr ṭangkai a, Brazilian rawlthar hi tunah chuan Cristiano Ronaldo hmun ruak luah tur ang hialin sawi a ni ta - tun dinhmun an thlen nan a thawhhlawk hle. 

Real hian January thla tira Real Sociedad an ngam loh hnuah league match nga khel leh tawhin hnehna an chang vek a, hetih chhunga Barca (vawi hnih inhnehtawk) leh Atletico (vawi hnih tlawm) result ten an pui tel bawk.