Foxes aia huai zawk Spurs
Pathianni zan Premier League inkhelah Tottenham chuan an mikhual Leicester City chu 3-1 in an hneh a, Mauricio Pochettino naute hian pathunaah an dinhmun an sawhnghet a, hmahruaitu Manchester City an phak lohna pawh point nga chauh a ni.
Son a tlu?
Spurs tan hian Davin-son Sanchez-a'n a club tana a goal hmasa ber ni turin minute 33-naah Christian Eriksen-a cross a tauhlut a, Denmark international midfielder hian second half-ah an goal hnihna a khung bakah hun tawp hma chiahin tun hnaia khel ṭha tak Son Heung-min chuan chak nemnghehna a khung bawk.
Spurs manager Mau-ricio Pochettino-a'n hliam vangin a player pawimawh Harry Kane leh Dele Alli te chhawr thei lo mah se an mamawh zat goal an khung thei a, a hun takah South Korean internatioanl Son a inlar thei zel hi an mamawh chhanna a ni.
Kum 26 mi Son hi inkhel tir lamah box chhunga Harry Maguire nen ball an inchuhna lamah a tlu a, tlu dera ngaih a nih avangin yellow card pek a ni. Tun season chhungin Spurs player dang - Kane, Lucas Moura leh Danny Rose te chu 'dive' vanga hrem an ni tawh bawk. Tun ṭuma mi erawh replay ennawn a nih hnuin Son hi a tlu der lo tih a lang.
Penalty hlah
Wembley Stadium-a inkhelah Jamie Vardy chu bench-ah dah a ni a, khelmual a luh hnuah boruak lian tak ṭum hnih a siam. England international hian James Maddison-a penalty hlawhchhuah pet sakin a hlah a, lut ni se la chuan 1-1 niin inkhel boruak a danglam thei ang. Foxes striker hian a hnuah goal khung tho mah se goal hnih an phurh hman tawh avangin danglamna a siam phak tawh lo.
Leicester manager Claude Puel chuan, "A nih dan phung pangngaiah chuan Jamie kha penalty pet tur chu a ni, mahse tun ṭuma mi kha penalty a ni satliah lo a, inkhel boruak zawng zawng ti danglam thei tur a ni," a ti a, penalty chu a hlawh chhuaktu Maddison-a'n pet se pawi a ti lo a ni.
Puel chuan sawi zawmin, "Kan goal chhuah hmasa zawk kha offside niin ka hmu, a vawi hnihna pawh handball niin ka hria. Hun ṭha tam tak kan insiam kan hlah laiin holam takin kan lamah a lut thung, a hmawr bawk dan fuh kan zirchhuah a ngai," a ti.