Tsonga hun a thleng ve leh ta

Jo-Wilfried Tsonga chuan 2017 hnua a vawi khat nan ATP Tour title a la ve leh ta, Pathianni zana Open Sud de France final inkhelah Tsonga hian a hnampui Pierre-Hugues Herbert chu 6-4, 6-2 a hnehin nomawi a chawi.

Kum 33 mi Tsonga hian 2017 October thla khan Vienna Open final a khel a, a hnuah a khelh ṭhat tawk loh bakah hliamin a tibuai ngun hle. Season khat leh a chanve chhung chu hlawhtlinna lian chang loin hun a hmang.

Mahse, world number 5 hlui hi tunah chuan a dam pangngai leh tawh a, season tir lam khan Montpellier-ah final lut turin player langsar Gilles Simon leh Jeremy Chardy te pawh a hneh leh thei tawh.

French tlangval Tsonga hian tun ṭuma final a khelhah hian inkhel a thunun hneh hle, Australian Open doubles champion nen hian set hnih an khelh chhung hian a service a hloh laiin a khungpui service erawh ṭum thum a chhuhsak thei thung a ni.