Chelsea leh Southampton an inhnehtawk

Southampton-in Premier League match ruk chhung a zawna an chak loh titawp nan Inrinni zan khan Thomas Tuchel hnuaia harhtharna chang mek Chelsea nen 1-1 in an inhnehtawk. 

St Mary's Stadium-ah Saints tan Takumi Minamino-a'n goal hmahruai a khung a, Chelsea-in second half-ah Mason Mount-a penalty hmangin an sut. Blues hian Thawhlehni zan Champions League inkhelah Atletico Madrid an hmachhawn nghal dawn a, Manchester United leh Liverpool ten Premier League-ah an inkhel leh bawk ang.

Liverpool-in beiseina sang tak nen Takumi Minamino an lalut a, Japanese midfielder hian beisei a phak loh avangin loan-in Southampton-ah an kaltir. Kum 26 mi Minamino hian theihna sang tak chu a lo nei ngei a, Chelsea nen hian minute 33-naah Nathan Redmond-a ball pek chu um lutin box chhungah rilru fim a hmang a, keeper Edouard Mendy hmaah Japanese midfielder hian 'cool' takin a khung.

Minamino hian Saints tan league match thum a khelh aṭangin goal hnih a khung a, Liverpool tan khan league-ah goal khat chiah a khung avangin harhtharna a chang mek tihin a sawi theih. Chelsea pawhin season ṭantirha hming langsar player an lalut a, Frank Lampard leh Thomas Tuchel kaihhuraina hnuaia hming chher ta ber erawh Mason Mount a ni.

Kum 22 mi Mount hian Danny Ings laka a penalty hlawhchhuah chu minute 54-naah a khung a, 1-1 in an inhnehtawk. Chelsea-in ball chang tam mah se chance ṭha insiam an harsat, Reece James-a'n goal khung theihna turah a hlah bawk. Chutihrualin Saints defender Jannik Vestergaard-a'n crossbar a tauh per a, point khat ve ve hlawhchhuah hi result awm tak a ni.

Second half ṭantirhah Tuchel-a'n Tammy Abraham aiah Callum Hudson Odoi a luhtir a, minute 76-naah Hakim Ziyech hmanga a thlak lehnghal avangin minute 31 chiah khelmualah hun a hmang.

Chelsea boss Thomas Tuchel chuan, "Player hnen aṭangin 100% ka beisei a, ka beisei ang ka hmu loah ka ngai. Thutlukna harsa tak a ni a, naktukah chuan kan theihnghilh leh tawh ang. Atletico Madrid nen kan inkhelh hunah pawh bul ṭan thei zinga mi a ni," tiin a sawi.

Southampton manager Ralph Hasenhuttl chuan, "Draw mah ila kan tan chuan chak ang mai a ni. Team ṭha tak laka point hmuh hi kan tan chuan a hlu a, ngai kan awh chhoh leh theih ka beisei," tiin a sawi.

Saints hian league match ruk a zawnin an chak lo a, Manchester United lakah 9-0 hiala an chak loh avangin Chelsea nena an inhnehtawk hi a pawimawh hle.