Kolkata derby-ah Bagan bawk an chungnung
Zirtawpni zan Indian Super League inkhelah Kolkata derby kan hmu a, team pahnih hi dinhmun inthlau sa an nih avangin ṭum dang angin a boruak erawh a 'hot' tawk lo - ATK Mohun Bagan chuan 3-1 in East Bengal an hneh a, league table chung ber an luah chhunzawm zel.
Bagan tana Roy Krishna goal hmahruai khung chu East Bengal hian minute 41-naah own goal hmangin an sut a, Indian player ball vawm thiam hmingthang Raju Gaikwad-a long throw aṭanga ball kal chu Bagan defender Tiri chuan an lamah a ti lut.
Mahse, team ṭha zawk Bagan an hnual rei lo - minute 70 hnu lamah David Williams leh Javi Hernandez-te chuan goal khat ve ve an rawn khung ve leh a, a tawpah 3-1 in Bagan an chak.
Playoff khel tur chiang tawh Bagan tan league round-a hmahruaitu ni chunga season thara AFC Champions League khelh beiseina a sang leh ta sawt a, East Bengal erawh playoff khelh beiseina pawh a bo ta rih thung.
Inrinni zan ISL inkhelah Jamshedpur FC chuan 2-0 in Mumbai City an barakhaih a, bench aṭanga luhtir Boris Singh leh David Grande-te chuan second half-ah goal khat ve ve khungin an team hi hnehna an chanpui a ni.
Jamshedpur tan Isaac Vanmalsawma, Ricky Lallawmawma leh Laldinliana Renthlei ten inkhel bul an ṭan vek a, Hnahthial tlangval Isaac-a'n hmuhnawm khawpa khelin a team tan a thawhhlawk hle.
Inkhel Results
ATK Mohun Bagan 3 - 1 SC East Bengal
AMB: Roy Krishna 15'; David Williams 17'; leh Javi Hernandez 89'
SCE: Tiri 41' (OG)
Jamshedpur FC 2 - 0 Mumbai City FC
JFC: Boris Singh 72'; David Grande 90+1'
Zanin Inkhel Tur
Hyderabad FC 07:30 PM ATK Mohun Bagan