Marseille che fuh thei lo

Khelmual pawn lama buaina nei Marseille chu an ke chheh a fuh thei rih lo. Inrinni zan French Ligue 1 inkhelah Marseille hi Nantes nen 1-1 in an inhnehtawk a, table-ah parukna dinhmun an luah chhunzawm.

Mualneitu Nantes lamin minute 50-naah Ludovic Blas goal hmangin hma an hruai a, mikhual team tan Dimitri Payet chuan second half minute 69-naah a sut, goal dang a lut zui lo. Marseille defender Hiroki Sakai chu hun tawp hma chiahin hnawhchhuah a ni a, result a ti danglam phak tawh lo thung.

Club neitute chet danah Marseille fans an lawm lo a, tun hnaiah buaina neuh neuh an nei. Club kaihhruai dana an lawm loh vangin training-na hmunah pawh buaina a lo chhuak hial tawh, manager Andre Villas-Boas chu chawlhtir lailawk niin, an chhawr nawn tawh lo.

Inrinni zan inkhel dangah Saint-Etienne leh Reims te 1-1 in an hnehtawh tawk a, tun hnai an league match nga chhung chu Saint-Etienne hian tlawm an nei lo. Season bul ṭan fuh lo viau mah se 14-naah an inhlangkai leh ta.

Nizan khan champion lai Paris Saint-Germain leh AS Monaco an inkhel a, result kan hre hman lo. Team ṭha PSG hi pathumna dinhmun luah mektu an nih avangin chetsual a thiang tawh lo.