La Liga a 'hot' thar - Atletico tlawm laiin Real an chak

Kar hmasa thleng kha chuan Atletico Madrid chu La Liga champion chiang ang deuhthawa sawi theih an la ni a, February kartawpna a herchhuah meuh erawh Spanish top flight league chanchin a ngaihnawm thar leh ta. 

Inrinni zan khan Atletico Madrid chuan rin loh takin Levante chu 2-0 in an ngam lo a, Atletico chak loh thu hriaa inlan Real Madrid erawh Real Valladolid khemualah 1-0 in an chak thung. 

Atletico an tlawm avangin an inkar zimna chu point thum chauh a ni ta a, Diego Simeone naute hi match khatin khel tlem zawk mah se ngaihngam taka awmna chi a ni tawh lo tih a hrechiangtute chu anmahni tho an ni. 

Nizan La Liga inkhelah Barcelona chuan Cadiz an mikhual bawk a, he thu buatsaih a nih lai hian result kan hre hman lo - Barca hian hnehna an chang a nih chuan Atletico nena an inkar hi khelh zat inangah point ruk chauh a ni zui ve bawk ang.

Atletico Madrid hian Nilaini zan khan khualmualah Levante an lenchilh a, hnehna chan an inbeisei laiin khualmualah Spanish club tenau nen hian 1-1 in an inhnehtawk. 

Wanda Metropolitano Stadium-ah meuh chuan Atletico fan-ten thawnthu a danglam tawh an beisei a, an beisei dan anga danglamna erawh a thleng lo - point khat an hlawhchhuah theih hramna team lakah khan point hlawhchhuah an nei tawh lo!

Levante hian minute 30-naah Atletico defending pherh zarzoin goal hmahruai an khung a, captain Jose Luis Morales-a shot chu Atletico centre back Mario Hermoso chuan an lamah a dang pial lut. 

Atletico-in hnehna an chan loh chuan nomawi hloh thei dinhmunah an ding tih inhriain an nawr a, an tih luatah an tlawm chiang ta thung - hun pek belhah Atletico keeper Jan Oblak chu corner aṭanga goal khung beiseiin a tlan chhuak a, mahse, a vuak let lam an tuar ta lo. Levante tan Jorge de Frutos chuan goal ruakah a pet goal a, a tawpah rin loh zawkin 2-0 in hnehna an chang. 

Atletico fan-ten Dani Cardenas tih hming hi tun hmain an la hre tam lo mai thei - Inrinni zana an tlawm hnuah erawh he hming hi an theihnghilh leh tawh kher lo ang. Kum 23 mi Spanish keeper hian Atletico lakah a khel ṭha takzet.

Madrid khaw club hian vawi 28 zet goal khung tumin shot an nei a, mahse, Cardenas an patlang zo lo - Joao Felix-a khung ngei tur nia lang ṭha tak taka a dante,  Renan Lodi beiseina a thlawna a chantirte kha Levante fan-ten an hmuh hmaih lo ang.

La Liga top scorer ni mek Luis Suarez-a'n goal 16-a khung tawh sa tipung turin hun ṭha a nei a, mahse, Barcelona striker hian yard 30 vela hla aṭangin freekick ṭha zet pet mah se goal post-in Levante a chhanhim. 

Atletico tan December 2019 hnua mahni muala league match-a an tlawm hmasak ber a ni a, Levante-in khualmuala league match-a Atletico an hneh hmasak ber a ni bawk - Morales-a'n hun ṭha eltiang a neih kha khung hmasa phei se chuan 3-0 a chak thei hial an ni!

Atletico Madrid tlawm thu hre sain Real Madrid an inlan a, Zinedine Zidane-a naute hian league nomawi hum tura an tana hun ṭha inhawn belh chu an bawhpelh duh lo - khualmualah Real Valladolid chu 1-0 in an hneh. 

Real Madrid-in khel ṭha lua lo mah se a pawimawh ber goal an khung a, Brazilian midfielder Casemiro chuan minute 65-naah inkhela goal awmchhun hi a khung - Real tan champion beiseina a sang leh sawt a, an hneh tak Real Valladolid erawh tla thei dinhmunah an din chhunzawm zel.

Kum 28 mi Casemiro hian minute 65-naa goal a khung hma hian vawi hnih ngawt chu Real hi hmahruaipui theihna hun ṭha a nei a, mahse, tun season-a a league goal ngana khungtu hian Toni Kroos hnen aṭanga ball duhthusam a hmuh hmaa a chance neih pahnih chu holam takin a hlah. 

La Liga table-a 19-na Valladolid lakah Real hi inchhuang viau tur an awm hran lo a, keeper Thibaut Courtois ding lo se point thum an hawn kher lo mai thei - Belgian keeper hian Fabian Orellana leh Saidy Janko khung tur nia lang chu ṭha takin a dansak ve ve. 

Atletico Madrid tlawm zanah Real an chak a, mahse, club tenau Valladolid laka an chance hlauh ngaihtuahin goal hmaah hriam an mamawh tih a lang a, Courtois-a hna ngah dan thlirin tlarhnung lam inchhuang thei an awm lo bawk. 

Real tan striker chhuanvawr Karim Benzema chu hliam vangin a inlan thei lo a, French striker tel loin Real hian goal khungtu tur an van tih a lang - Benzema hmunruaka lut Mariano Diaz chuan goal hnih khung mah se offside vangin pawm a ni lo ve ve. 

Hetihlai hian Real hian hliam vangin Benzema bakah captain Sergio Ramos, Eden Hazard, Marcelo leh Dani Carvajal-te an chhawr thei lo vek a, player hming leh theihna enin heti zat player chhawr theih loh hi chhiatpui tham a ni hrim hrim. 

Chutihrual chuan football-in 'inhliam'a ken tel miau avangin chhuanlam atana hman reng chi erawh a ni lo a, Champions League last 16 first leg-ah Atalanta chu Nilaini zanah an lenchilh dawn zui - Valladolid laka an khelh dan anga an khelh chuan Champions League-ah 'meuh' chuan result a danglam tawh ang.