Bayern Munich an chesual nawn

Inrinni zan khan Bayern Munich-in Eintracht Frankfurt an tlawh a, 2-1  in an chak lo. Hansi Flick-a hote hian FIFA Club World Cup nomawi an chawi hnuah chak an la nei lo a, Frankfurt laka an tlawm hma hian Arminia Bielefeld nen 3-3 in an inhnehtawk. Bundesliga inkhel dangah Borussia Dortmund-in Schalke 4-0 in an sawp.

Commerzbank Arena-ah Eintracht Frankfurt-in inkhel bul an ṭan ṭha a, minute 12-na lekah Filip Kostic cross chu Daichi Kamada-a'n ṭha zetin a ti goal. Japanese midfielder Kamada hian minute 31-naah Amin Younes goal khung tur a siamsak bawk.

Germany international Younes hian ṭha zetin a pet goal a, keeper Manuel Neuer-a tan dah ngaihna a awm lo. Second half-ah Bayern Munich an insiamrem a, Leroy Sane-a'n Frankfurt defender-te a bum kual hnuah Robert Lewandowski tan a siamsak a, Polish striker hian minute 53-naah awlsam takin a khung.

Bavarians tan Kingsley Coman goal hmaah a vannei lo a, French winger hian chance ṭha a hlah. Bayern-in Thomas Muller, Serge Gnabry, Douglas Costa leh Benjamin Pavard te awm loh an tuar a, Flick-a hnuaia vawi ruk an chak lohna an tawng.

Veltins Arena-ah Schalke keeper Ralf Fahrmann chu minute 32-naah inhliam vangin thlak a ni a, hemi hnu hi chuan Dortmund-in a khat mawi tawkin an goal an khung.

Dortmund-in an nawr bet a, minute 42-naah defender tihsual hmang ṭangkaiin Jadon Sancho-a'n goal hmahruai a khung. Minute 45-naah Erling Braut Haaland-a'n goal mawi bik a khung a, Norwegian striker hian bicycle kick hmangin a khung.

Second half-ah Marco Reus-a pass chu minute 60-naah Raphael Guerreiro-a'n a khung a, minute 79-naah English rawlthar Jude Bellingham-a siamsak chu Haaland-a'n awlsam takin a pet goal ve bawk.