Portugal-ah Ronaldo a bo!

Paris Saint-Germain laka Lionel Messi leh Barcelona an mualpho hnu lawkah Cristiano Ronaldo-a'n a hming ropuina belhchhahna remchang nei mah se FC Porto lakah hmuh tur a awm lo!

Nilaini zan Champions League last 16 inkhelah Porto chuan an ram fapa rangkachak Ronaldo khelhna Juventus chu 2-1 in an hneh a, Porto khelmual Estadio do Dragao-ah Ronaldo khel mahse a ngawihchawih zan tak a ni!

Porto tan Mehdi Taremi leh Moussa Marega-te chuan goal khat ve ve an khung a, goal khung loin Italian champion an haw mai dawna a lan hnuah  Federico Chiesa chuan Juve tan goal khat a khung ve hram. 

Juventus tlawm mah se second leg khelh tur a la awm avangin beisei erawh a la bo lo a, khualmuala goal an khung avangin beiseina sang tak an la nei ang. 

Porto-in Juventus an la hneh ngai lo a, Nilaini zanah pawh mahni muala khel tur ni mah se Portuguese club tan beisei a sang lo - mahse, minute hnihna lekah goal hmahruai an khung!

Juve tan midfielder Rodrigo Bentancur-a'n ṭul lo tak leh chhe zetin keeper Wojciech Szczesny chu ball a pe a, Bentancur tihsual nangtu Taremi chuan goal hmahruai khung nan a hmang. 

Ronaldo hmel a lo lang vat a, Juventus forward hi an goal chhuah danah a lawm lo tih a lang - mahse, Juve-in goal an khung thei chuang lo a, Adrien Rabiot chuan invawrh chungin mawi zeta goal khungna remchang nei mah se Porto keeper Agustín Marchesín-a'n a dang ṭha hle. 

First half-ah team pahnihin chance an nei mumal lo ve ve a, second half ṭantirah Porto bawk an lang nawn - inkhel ṭan aṭanga second 19-na lekah Wilson Manafa siamsak chu vengtu nei loa awmMarega chuan an goal hnihna turin a khung a, Juve leh Ronaldo an ngawi. 

Italian club-in goal hnih an chhuah hnuah pawh an insiamṭha hleithei lo a, chance an nei meuh lo - Porto tan midfielder Sérgio Oliveira chuan an goal thumna khung theihna remchang a nei a, mahse, Szczesny chuan a dang. 

Hun tawp nan minute riat chiah a awm tawh a, Juve an ngawi reng bik tawh lo - midfielder Rabiot -a siamsak chu Chiesa  chuan tawih zetin a pet goal a, 2-1 in inkhel a tawp zui. 

Italy international Federico Chiesa hi April 2018-a Blaise Matuidi (quarterfinal vs Real Madrid) hnua Ronaldo tih loh, Juventus tana Champions League knockout stage-a goal khung leh hmasa ber a ni!

Ronaldo erawh minute 90 chhung a reh tiin a sawi theih a, second leg-ah a team a chakpui a nih chuan Portugal-a a mualphona hi a hliahkhuh thei ang - March 9 zanah second leg hi Turin khawpuiah khelh a ni dawn a, Porto tan kut benga lawm a la hun lo.

*    Porto-in European football-a Juventus an hneh hmasak ber a ni a, a hma an intawn vawi ngaah vawi li an tlawm a, vawi khat an inhnehtawk. 

*    Porto hi Champions League knockout stage-a an match hnuhnung 10-a an vawi khat chakna chiah a ni a, hemi hmaa an match hnuhnung pakuaah vawi sarih an tlawm. 

*    Juventus pawh Champions League knockout stage-a an match hnuhnung palia vawi thum an tlawmna a ni a, hemi hmaa an knockout match 14-ah vawi thum chiah an tlawm thung - vawi thum an draw a, vawi thum an tlawm. 

*    Second 61-na leka Mehdi Taremi goal kha David Alaba (Bayern vs Juventus; April 2013 - 24 seconds) hnua Champions League knockout stage-a goal lut rang ber a ni. 

*    Iran international Taremi kha Iranian zinga Champions League-a goal khung thei pangana (Ali Daei, Mehdi Mahdavikia, Ali Karimi, Sardar Azmoun) a ni a, knockout stage-a khung thei hmasa ber a ni bawk. 

*    Juventus-in 1997-98 final (vs Real Madrid - kum 26 leh ni 353) hnua chawh ruala Champions League-a an starting XI naupang ber an hmang a, Porto laka bul ṭante kum chawhrual kha kum 27 leh ni 122 a ni.