FC Goa tan beisei tur a la awm

Indian Super League-a ngaihnawm tulh tulh - Nilaini zan khan FC Goa chuan 3-1 in Odisha FC an hneh a, league match hnih chiah khelh tur nei tawh chungin semifinal khelh beiseina an la nei zel. 

Goan club tan hian Alberto Noguera leh Jorge Ortiz-ten minute 26 chhung lekin goal khat ve ve an khung a, Odisha tan Diego Mauricio chuan minute 30-naah sut ṭhen mah se a team a beng harh zo lo. 

Hun tawp nan minute 15 chauh a awm tawh tihin Ivan Gonzalez chuan Goan club chak nemngheh nan an goal thumna a khung a, hun a tawp meuh chuan 3-1 in FC Goa an chak. 

Odisha tan Lalhrezuala Sailung chuan Indian Super League-a a match hmasa ber khelin bul a ṭan a, an result avangin zan chhinchhiah tlak tak erawh a ni lo. 

Daniel Lalhlimpuia chuan Odisha tan inkhel bul a ṭan bawk a, regular player Jerry Mawihmingthanga chu minute 46-naah bench aṭangin luhtir a ni ve bawk. 

Goa hian hnehna an chan avangin he thu buatsaih lai hian table-ah palina an ni chho a, nizan Chennaiyin leh NorthEast United inkhel result a zirin Highlander hian Goan club hi an la pel leh thei ang.

Hetihlai hian Nilaini zan vek hian ISL knockout stage khelh hun tur tihchian a ni a, semifinal first leg chu March 5 & 6-ah khelh a ni ang a, March 8 leh 9-ah second leg khelh a ni ang - away goal rule a awm dawn lo a, inkhel pahnih belhkhawma goal khung hnem zawk chu semifinal lut tur an ni dawn. 

GMC Stadium, Bambolim leh Jawaharlal Nehru Stadium, Fatorda-ten semifinal hi an thleng a, March 13-ah final khelh tur niin Jawaharlal Nehru Stadium, Fatorda thoin final hi a thleng dawn. 

February 28 hian league match hnuhnung ber chu khelh tur a ni a, league-a point hmu sang ber chuan League Shield Winner dawngin AFC Champions League group stage khel turin an tling bawk ang. 

FC Goa    3 - 1    Odisha FC

FCG: Alberto Noguera 18'; Jorge Ortiz 26'; Ivan Gonzalez 75'

OFC: Diego Mauricio 30'

ATK Mohun Bagan    7:30 PM    East Bengal

#    Team    Pld    W    D    L    GF    GA    GD    Pts

1    ATK Mohun Bagan    17    11    3    3    23    10    13    36

2    Mumbai City    17    10    4    3    27    15    12    34

3    Hyderabad    18    6    9    3    25    17    8    27

4    Goa    18    6    9    3    29    22    7    27

5    NorthEast United    17    6    8    3    24    21    3    26

6    Bengaluru    18    5    7    6    23    23    0    22

7    Jamshedpur    18    5    6    7    16    20    -4    21

8    Chennaiyin    18    3    9    6    13    19    -6    18

9    East Bengal    17    3    8    6    15    22    -7    17

10    Kerala Blasters    18    3    7    8    22    33    -11    16

*    Mohun Bagan leh Mumbai City hi semifinal khel tura tling chiang tawh an ni. 

*    Nizana Chennaiyin leh NorthEast United inkhel result a zirin table hi la danglam leh thei a ni.