Ka hlauh chu hriatna hloh a ni - Sir Alex

Kumin May 27 hian 'Sir Alex Ferguson: Never Give In' tih film chu tihchhuah a ni dawn a, Manchester United manager hlui Sir Alex Ferguson chuan, "Ka hlauh chu hriatna hloh a ni," tiin a sawi.

Film buaipuitu hi Ferguson-a fapa Jason a ni a, khelmual chhung leh pawna Sir Alex-a chanchin kimchang taka phochhuah a ni dawn. Scotland-a Ferguson-a inkhelh hun lai te bakah hlawhtling taka Aberdeen leh Manchester United a enkawl dan te a awm ang.

Kum 79 mi Ferguson chuan, "Kum 2018-a thluaka thisen zam chat (brain haemorrhage) vanga damdawi ina ka awm khan ka hlauh chu hriatna hloh a ni. Ka chanchin behchhana film siam a nih hian ka hun tawn pawimawh - hun hlimawm leh hrehawm te a rawn  ti thar leh hle. Ka fapa buaipui a ni a,  he film-ah hian thudik leh a chhungril thlengin hmuh tur a awm ang," tiin a chanchin chipchiar hmuh tur a awm tur thu a sawi.

Ferguson hian kum 2013 khan manager hna a chawlhsan a, May 5, 2018 khan brain haemorrhage vangin a thluak zai a ni a, ni eng emaw zat Salford Royal Hospital-ah a awm a ngaih phah a ni. Sir Alex Ferguson-a film hi cinema hall-ah tihchhuah a ni dawn a, Amazon Prime aṭangin a en theih bawk ang. 

Film-ah hian tun hmaa la tichhuah ngai loh a nupui Cathy bakah a fapa pathum Darren, Mark leh Jason te thusawi a awm. A player hlui Eric Cantona, Ryan Giggs leh Gordon Strachan te pawh an lang a, Aberdeen leh Manchester United a enkawl laia a assistant manager Archie Knox pawhin hmun pawimawh a chang.

Sir Alex hian kum riat Aberdeen a enkawl chhungin nomawi lian tham 11 a chawi a, Scottish Premier Division pathum leh European Cup Winners' Cup te chu a langsar zingah an tel. Manchester United enkawl zuiin kum 26 leh a chanve a enkawl a, United manager hna chelh rei ber record a siam. Ferguson hian nomawi lian tham 38 chawiin Premier League nomawi 13 leh Champions League pahnih te a tel a ni.