Manchester City an sang fal zel

Premier League hmahruaitu Manchester City chuan point 10-a sang fal turin Nilaini zan khan Everton 3-1 in an hneh. Pep Guardiola hote hi inelna hrang hrangah match 17 chhung an chak zawn tawh a, calendar-a English top flight zinga match hmasa 10 chak thei hmasa ber an ni bawk.

Goodison Park-a inkhelah Man City-in Phil Foden hmangin hma an hruai a, Everton-in Richarlison hmangin first half-ah an sut. Toffees hian Pep Guardiola hote hi an chelh ve thei mai dawnin lang mah se player class sang danglamna a lang a, second half-a Riyad Mahrez leh Bernardo Silva te goal hmangin mikhual team-in hnehna an chang.

Goodison Park-ah Man City an chungnung nghal a, chutihrualin Everton tlarhnung a phui ṭha hle. Italian manager Carlo Ancelotti-a'n inkhelh hmain, "Man City-in ball an chang tam ang," a tih chu a thleng dik a, goal venhim erawh an tum ruh hle. Everton tana hna harsa sa tih harsat belhchhah turin minute 18-na lekah Yerry Mina a inhliam a, Seamus Coleman-a'n a thlak. 

Man City pawh bul ṭantu zingah Kevin de Bruyne leh Sergio Aguero te an awm lo a, inhliam vangin tun hnaia che ṭha em em Ilkay Gundogan squad-ah a awm lo. Amaherawhchu City hian Phil Foden an nei a, minute 32-naa English midfielder ball pet chuan substitute Coleman a per hnuin goal-ah a lut.

Everton-in forward Dominic Calvert-Lewin tel loin tlarhnung phui ṭha Man City lakah si phurh an sut thei a, Ancelotti hote an vannei tel bawk. Ding lam aṭanga ball rawn kal chu Lucas Digne-a'n kawh zetin goal-ah a pet a, goal ban a per hnuah Richarlison per lehin goal-ah a lut. 

Kumin January 3 hnua Man City-in open play-a goal an chhuah lehna hmasa ber a ni a, attacking game khel thiam Pep Guardiola-a'n tlarhnung rem phui pawh a thiam tih a chiang hle.

Everton-in Man City lakah point khat tal hlawhchhuah an tum a, keeper Jordan Pickford-a'n Joao Cancelo leh Bernardo Silva te goal khung tur dang bawk mah se player talent ṭha bik danglamna a lang. Leicester City champion ṭuma player thiam ber Riyad Mahrez-a'n minute 63-naah a ke veilamin goal kilah tak a khung a, English keeper tan dan ngaihna a awm lo.

Man City-in 2-1 a hma an hruai hnuah nuam sa taka an chak theih nan Bernardo Silva-a'n minute 77-naah a khung belh. Portuguese midfielder hian goal khung kawngah pawh hliam vanga khel thei lo Gundogan-a hmun ruak a luah thei tih a rawn lantir. 

Pep Guardiola hote thiamzia a lang a, hun tawp lamah Kevin De Bruyne a rawn khelh leh theih tawh bawk avangin Man City champion-na kawng dal hi a harsa tawh ang.

Everton lakah Man City khel ṭha mah se goal khung thei forward an kawl rih lo. Gabriel Jesus-a'n Toffees lakah chance ṭha bik ṭum hnih a hlah a, Sergio Aguero an chhawr theih hunah an harsatna hi an chingfel thei a nih chuan Premier League chauh ni loin Champions League, FA Cup leh League Cup te pawh an beisei tel thei ang.

Everton manager Carlo Ancelotti chuan, "Manchester City hi team ṭha ber an ni a, huang khatah kan awm lo. Liverpool nena kan inkhel tur erawh a danglam ang. Anni pawh hi team ṭha tak ni mah se kan khelh ṭhat tluan lai a ni a, football-ah chuan engpawh a thleng thei a ni," tiin a sawi.  Italian manager Ancelotti-a'n Man City aiin Liverpool a dah hniam zawk a, tunkar tawpa Merseyside derby khelh tur en a châkawm sawt.

Manchester City boss Pep Guardiola chuan, "Everton an inrem phui ṭha em em a, amaherawhchu dawhtheihna kan neih avangin kan phu ang result kan hmu. Thlasik lai chuan khelmual a ṭha tawk lo a, Everton player-te an chak bawk avangin inkhel harsa tak a ni," tiin a sawi.

Burnley    1 - 1    Fulham

BUR : Ashley Barnes 52'

FUL : Ola Aina 49'

Everton    1 - 3    Manchester City

EVE : Richarlison 37'

MAN : Phil Foden 32'; Riyad Mahrez 63'; Bernardo Silva 77'

Wolverhampton Wanderers    1:30 AM    Leeds United

Southampton    6:00 PM    Chelsea

Burnley    8:30 PM    West Bromwich Albion

Liverpool    11:00 PM    Everton

Fulham    1:30 AM    Sheffield United

West Ham United    5:30 PM    Tottenham Hotspur

Aston Villa    7:30 PM    Leicester City

Arsenal    10:00 PM    Manchester City

Manchester United    12:30 AM    Newcastle United

Brighton & Hove Albion    1:30 AM    Crystal Palace

Leeds United    11:30 PM    Southampton