Haaaland-a'n Dortmund a chakpui

Borussia Dortmund-in Bundesliga-ah beisei pha lo mah se Champions League-ah an che ṭha. Nilaini zan khan Dortmund hian UCL last 16 first leg-ah Sevilla khelmual Ramon Sanchez Pizjuan luhchhuahin 3-2 in hnehna an chang.

Spanish club-in Suso hmangin an pet goal hmasa a, amaherawhchu Erling Braut Haaland goal hnih leh Mahmoud Dahoud goal khat hmangin German club-in an chhanglet. Sevilla tan Luuk de Jong-a'n minute 84 goal khat rawn khung ve lehin first leg inkhel result tidanglam pha lo mah se quarterfinal luh nan a la pawimawh thei ang.

Sevilla tan minute sarihnaa Suso ball pet chu German defender Mats Hummels-a'n a dan per hnuah a goal a, mualneituin bul an ṭan ṭha. Borussia Dortmund-in phurna an mamawh a, minute 19-naah Mahmoud Dahoud-a'n box pawn aṭangin a pet goal a, mikhual team a tiphur hle.

Erling Braut Haaland theihna a rawn lang zui a, Norwegian striker leh Jadon Sancho te an inthlawp hnuah Haaland-a'n kawh zetin minute 27-naah a pet goal. Minute 43-naah Sevilla tihsual hmang ṭangkaiin Marco Reus-a ball pek chu Haaland-a'n a ke vei lam bawkin chiang fahranin a pet goal.

Second half-ah goal khat chiah hmuh tur a awm a, Sevilla-in minute 43-naah Luuk de Jong hmangin an pet goal. March 9, Thawhlehni zanah second leg khelh a ni ang.

Norwegian striker Haaland hi Champions League-a goal nga leh goal 10 khung thei hmasa ber a ni a, match hmasa 13 leka goal 17 leh a aia tam khung tling thei awmchhun a ni. 

Haaland hian goal 18 a khung tawh a, kum 21 tlin hmaa goal khung tam ber Kylian Mbappe siam chu goal khat chiahin a pha tawh lo. Norwegian striker hian July 21-ah kum 21 a tling ang.

Dortmund striker Erling Haaland chuan, "Game plan ṭha tak kan nei a, coach Edin Terzic hi a fel a, kan khelh dan tur pawh kan sawi dun nasa. Sevilla nen hian ka khelh ṭhat tur thu min hrilh a, min fuihna kan hmang ṭangkai. Kan tan chuan chakna pawimawh tak a ni. Goal thum kan khung hi a ṭha a, goal hnih chhuah erawh a ṭha lo," tiin a sawi.

Sevilla forward Luuk de Jong chuan, "First half-ah kan khel ṭha lo a, Champions League anga inelna sangah chuan tihsual a pawi tawh a ni. Second half-ah erawh kan khel ṭha a, goal thumna khung lo mah ila goal hnihna kan khung kha kan tan a hlu hle," tiin a sawi.

RB Leipzig    0 - 2    Liverpool    

LIV: Mohamed Salah 53; Sadio Mane 58'

Barcelona    1 - 4    PSG

BAR: Lionel Messi 27' (P)

PSG: Kylian Mbappe 32', 65', 85; Moise Kean 70'

February 17, Nilaini

Sevilla    2 -3    Borussia Dortmund

SEV : Suso 7'; Luuk de Jong 84'

DOR : Mahmoud Dahoud 19'; Erling Braut Haaland 27', 43'

FC Porto    2 - 1    Juventus

FCP : Mehdi Taremi 2'; Moussa Marega 46'

JUV : Federico Chiesa 82'

Atletico Madrid    1:30 AM    Chelsea

Lazio    1:30 AM    Bayern Munich

Atalanta    1:30 AM    Real Madrid

Borussia    1:30 AM    Manchester City

M'gladbach