Osaka-i'n Serena beiseina titawp

Serena Williams-i'n Grand Slam lak tam lama Margaret Court record vawi 24 nih rual turin vawi khat champion la mamawh mah se nimin khan Naomi Osaka lakah a beiseina a tawp. Rod Laver Arena-a hmeichhe Australian Open semifinal inkhelah Osaka a ding chang a, 6-3, 6-4 in a idol Serena a hneh.

Kum 23 mi Osaka hian final-ah Karolina Muchova hnehtu Jennifer Brady a hmachhawn dawn a, hmeichhe nomawi inchuhna hi Rod Laver Arena-ah February 20, Inrinni tlai dar 2:00-ah khelh a ni ang.

Osaka hian Grand Slam final vawi thum a khelh tawhah hnehna a la chang vek. A khingpui tur Brady tan erawh tun ṭum hi a vawi khat Grand Slam final khelhna tur a ni a, nikuma Australian Open semifinal a thlen kha tun hmaa a thlen san ber ṭum a ni.

Naomi Osaka hian hnehna chang turin minute 75 a hmang a, set khatna la turin minute 38 a mamawh a, set hnihnaah minute 37 a hmang. Japanese nula hian Serena hi vawi li a hmachhawn tawh a, vawi thum hnehna a chang.

Osaka chuan, "Dik taka sawi chuan Serena hmachhawn hi ka ngai hlu em em a, ka naupan lai aṭanga ka ngaihsan a ni a, a inkhel hi ka en nasa thei hle. Ani nena court khata khelh dun hi ka tan chuan mumang ram a ni," tiin a khingpui a fak.

Serena hian Australian Open-ah vawi sarih champion tawhin a record hi a chhuanawm hle. Chutihrualin Serena hian 2017-a Australian Open a champion hnuah Grand Slam a la champion leh lo.

American tennis star Serena hian September 2017 khan fanu a nei a, 'nu' a nih hnuah pawh Wimbledon leh US Open-ah ṭum hnih ve ve final lut leh mah se nomawi inchuhnaah a vanduai zawkah a ṭang vek. Serena hi kum 39 mi a nih tawh bawk avangin Margaret Court-i record nihrual hi a harsa ang.

Osaka hian match 19 chhung hneh loh a tawng tawh lo a, Japanese nula hian inrintawkna a ngah a, Serena erawhin tihsual a ngah thung.

Serena chuan, "Osaka ka hmachhawn vangin ka hlauthawng lo. Tihsual ka ngah avangin ka chak loh phah a ni. Dik taka sawi chuan tihsual nei tlem ilang chuan 5-0 a ni chho thei hial ang. Mahse tihsual ka ngah tlat a ni," tiin tihsual a ngah vanga chak loah a inngai.