Australian Open-ah Djokovic-a'n final a lut

Nimin khan Novak Djokovic chuan Rod Laver Arena-ah Aslan Karatsev chu 6-3, 6-4, 6-2 a hnehin Australian Open final a lut.

World number 1 Djokovic hian vawiin chawhnu dar 2:00-a inhmachhawn tur Daniil Medvedev leh Stefanos Tsitsipas inkhela chak zawk nen nomawi an inchuh ang.

Kum 27 mi Aslan Karatsev hi qualifier aṭanga inhlangkai a ni a, Russian tlangval tan chuan Australian Open semifinal thlen ringawt pawh hi thilmak a tling tawh.

Hetihlai hian Djokovic erawh Australian Open-ah vawi riat ngawt a champion tawh a, record chelhtu a ni thung. Grand Slam chinah hi chuan stage a sang tulh tulh a, tawnhriat nei player danglamna a lang ṭhin.

Nimin inkhelah pawh Karatsev hian Djokovic tihlauthawng ve hman deuh mah se player ṭha zawk hian straight set-in hnehna a chang. Set khatna hi minute 35 chhung lekin a la thei a, second set-ah minute 45 hmangin set thumnaah minute 33 chiah a hmang.

Serbian tlangval hian aces vawi 16 a nei a, Karatsev aiin vawi 10-in a nei ngah a, kawng hrang hranga tehin Djokovic a chungnung lawr lak.

Kum 33 mi Novak Djokovic hi champion tura rinkai a ni a, final lut tura tha a sen tam loh bakah hahchawlhna hun a ngah avangin a khingpuite aiin a dinhmun a ṭha zawk.

Australian Open champion lai Djokovic hi Grand Slam vawi 17 a champion tawh a, vawi 20 champion tawh Roger Federer leh Rafael Nadal te a hnaih chho zel.

Djokovic-a harsatna ber chu French Open a ni a, clay court inelnaah hian vawi khat chiah a la champion. Hemi a nih avang hian Djokovic tan a che ṭhatna hmun Australian Open-a champion hi a pawimawh a, a kum a la naupan bawk avangin Federer leh Nadal te record khum turin a dinhmun a ṭha hle.

Tun ṭum inelnaah hian Djokovic-a'n pum lamah harsatna a nei a, Karatsev nen erawh buaina a nei lo.

Serbian tlangval Djokovic chuan, "Tun inelnaa ka dam ṭhat ber a ni. Na nei miah loin ball ka vaw thei a, a nuam ka ti hle. A hun takah ka dam ṭha a, ka lawm hle a ni," tiin a sawi.

Australian Open-ah mipuiin inkhel an en leh thei tawh a, Djokovic laka chak lo Karatsev hi tun inelnaa a chet ṭhat avangin ngaihsan a hlawh. Nimin inkhelah pawh hian court a chhuahsan laiin mipuiin 'standing ovation' an pe a, Thawhṭannia tihchhuah tur ranking thar berah pawh 50-na chinah a awm thei ang.

1. Novak Djokovic    bt (6-3, 6-4, 6-2 )    Aslan Karatsev

Vawiin Inkhel Tur

4. Daniil Medvedev    2:00 PM    5. Stefanos Tsitsipas

1. Novak Djokovic    2:00 PM    Medvedev/Tsitsipas

22. Jennifer Brady    bt (6-4, 3-6, 6-4)    25. Karolina Muchova

3. Naomi Osaka    bt (6-3, 6-4)    10. Serena Williams

22. Jennifer Brady    2:00 PM    3. Naomi Osaka

9. Dodig/Polasek    bt (4-6, 6-4, 6-3)    2. Pavic/Mektic

Vawiin Inkhel Tur

6. Murray/Soares    7:30 AM    5. Ram/Salisbury

2. Sabalenka/Mertens    bt  (7-5, 6-4)    4. Schuurs/Melichar

3. Siniakova/Krejcikova    bt (6-3, 6-2, 6-4)    Jurak/Stojanovic

3. Siniakova/Krejcikova    10:30 AM    2. Sabalenka/Mertens

Note : Hming hmaa number awm hi seeded number a ni.