Ibra lim an suasam

Swedish striker Zlatan Ibrahimovic-a'n khelmual chhung leh pawn lamah chanchin a neih chhunzawm reng a, Malmo stadium pawna a lim chu fan-ten an suasam leh ta. 

October 2019 khan Ibra lim hi tlangzarh a ni a, mahse kum 20 liam taa Malmo-a a career ṭantu hian a hnu lawkah Malmo hmelma kumhlun Hammarby-ah 25% share a lei. Malmo fans tam zawkin Ibra chet dan an hrethiam lo a, a lim suasam lamah an ṭang ta a ni. Ibra lim hi siam ṭhat tura lak bo a ni a, thuneitute chuan a hma ang thoa dah leh ngei an tum thu an sawi. 

Ibra lim hi fans ruhkawl zual ṭhenkhatin an lo suasam fo tawh a, rawng te kapin, a hnar an thlawn a, tunah hian a ke lam ti chhiain an nam tlu a ni. Malmo deputy mayor Frida Trollmyr chuan, "Zlatan-a nungchang avanga fans tam tak an lungawi lo hi a awm em em a, mahse heti lo zawng hian lungawi lohna chu lantir theih a ni," tiin an sawi.