Santosh Trophy NE Zone Qualifier Vawiin chawhnu dar 2:00-ah Mizoram Vs Tripura

Santosh Trophy qualifying round - North East Zone-ah vawiin hian inelna thlengtu Mizoram an inlan dawn a, chawhnu dar 2:00 hian Lammualah Tripura nen an inhmachhawn ang.

Mizoram hi kum 2004 khan a vawi khat nan India ram state-te tana football inelna sang ber Santosh Trophy-ah hian coach H. Vanlalthlanga hoin an champion a, tun ṭumah hian nomawi chawi ṭuma assistant coach Lalsangzuala Hmar hoin an thawk chhuak dawn.

Coach Sanga hian Mizoram team hi Santosh Trophy hnuhnung pahnihah a enkawl a, final round thlenpui ve vein semifinal-ah an vanduai ve ve. Mizo coach thawkrim hian Mizoram Premier League-ah Chanmari FC leh Chhinga Veng FC te a champion pui a, tualchhung inelnaah sulhnu ṭha tak a nei tawh a, Santosh Trophy nomawi hi a hmachhawp zinga mi a ni.

Mizoram coach Sanga chuan, "Tripura leh Manipur inkhel kan en a, an ṭha hran lo. Chuvangin attacking football kan khel dawn a, tlarhmaah pawh MC-a, Notea leh Romawia te goal nawr turin an lut nghal dawn," tiin goal khung tam an tum thu a sawi a, Bawngkawn tlangval MS Dawngliana erawh chhungkaw harsatna avangin bul a ṭan dawn lo tih a sawi tel bawk.

Tripura hian an match hmasa berah Meghalaya 3-0 in an hneh lo a, hei vang hian Mizoramin an match hnuhnung bera Meghalaya an hmachhawn huna an dinhmun tiṭha turin Tripura lakah goal thum aia tam an khung a ngai. Sanga chuan, "Kan goal nawr a nat theih nan goalkeeper-ah Under 21 player RS-a chance kan pe dawn a, tlarhma lamah insiksawi a awlsam phah ang," tiin Vanglaini a hrilh.

Santosh Trophy-ah hian kum hnih liam ta aṭang khan playing eleven-ah Under 21 pahnih an awm ngei ngei a ṭul a, he dan hi Republic Veng rawlthar RS Lallawmzuala hian vanneihpuiin Mizoram tana koh a nih hmasak berah bul a ṭan nghal dawn tihna a ni.

Final round lut tura Mizoram elpui ber tur chu Meghalaya an ni dawn a, chutihrualin nuam sa zawka match hnuhnung ber khelh an duh a nih chuan goal thum tala an chak a ngai ang. India ram pum aṭangin team 10-in final round an lut dawn a, team panga Odisha, Sikkim, Karnataka, Services leh Goa te an tling tawh a ni.