Ajax nen a harsa dawn - Real boss

Real Madrid chuan zanin dar 1:30-ah Champions League last 16 khel turin Ajax an lenchilh dawn a, Madrid boss Santiago Solari chuan an tan hna a awlsam loh tur thu a sawi. 

Solari chuan, "Champions League match dang ang bawkin a harsa dawn a, last 16 hi paltlang kan tum a nih chuan theihtawp kan chhuah a ngai ang," a ti a, Dutch club chu a nauten an ngainep palh ang tih a hlau.

Argentine manager chuan Ajax hi fak chhunzawmin, "Season hmasa pawh khan team ṭha tak an ni tih an lo pholang tawh a, tun season-ah pawh a danglam lo. Ajax hi player naupang rual an chher thiam avangin fak an hlawh ṭhin a, attacking football hmuhnawm tak an khel bawk," a ti. 

Team pahnih hi vawi 12 an lo intawng tawh a, Real hian vawi sarih hnehna changin vawi li an tlawm a, vawi khat an inhnehtawk - mahse he record hi Real tan inchhuanpui ngawt chi a ni tawh lo. 

Group E-ah Ajax hian match rukah tlawm an nei miah lo a, hmahruaitu Bayern Munich nen vawi hnih an intawnah an inhnehtawkpui ve ve bawk - hei hian an dinhmun a hrilhfiah chiang viau. 

Ajax hian tlarhmaah a match hnuhnung 12-a goal 11 khungtu Dusan Tadic, league match 14-a goal 10 khung tawh Hakim Ziyech leh tun season-a goal 15 khung tawh Klaas-Jan Huntelaar te an nei a, tlarhnung lama an ban rinawm kum 19 mi Matthijs de Ligt pawh hi European club lian te chil ti puttu a ni. 

Real tana chanchin lawmawm erawh season thara Barcelona pan tur, Ajax midfielder pawimawh Frenkie de Jong chu hliam vangin Real a hmachhawn turin a dinhmun a la chiang lo.