Keeper ropui Gordon Banks a thi

England goalkeeper neih tawh zinga ropui ber ang hiala chhal ngam Gordon Banks chu nimin khan a thi a, kum 81 mi a ni. 

A chhungte chuan a thih thu puangin, "Gordon a thi ta tih puan a ngai hi kan tan chuan thu lungchhiatthlak a ni a, kan hrilh a hai takzet. Mahse, a dam laia a thil tih tawhte khan min tihlimin, kha baka inchhuanna tur thil dang kha a awm thei tawh chuang lo ang," tiin an sawi.

FIFA goalkeeper of the year atana vawi ruk ngawt an thlan tawh Banks hian 1966 khan an ram chu World Cup-ah a champion pui a, match zawng zawng a khel kim vek. 1970 World Cup-a Brazil nen an inkhelh ṭuma Pele goal khung tur a dan chu tun thlenga sawi hlawh khawpa ropui a la ni hial.

England leh Brazil intawn ṭum hian Brazil legend Pele-a'n hnai tak aṭangin kawh zeta a ball tauh rawn sawt kang leh chu Banks hian rang zetin a lo dan sak a ni. Banks chuan, "World Cup 1966 ka champion pui vang ni loin, Pele goal khung tur ka dan sak vang zawk hi nakina mi ten min la hriatrengna tur zawkah ka ngai," tiin a lo sawi lawk tawh.

Sheffield-a piang Banks hian ram tan match 73 a khel hman a, club lamah chuan Stoke leh Leicester tana a khelh laiin League Cup a chawi - 1973 khan inkhelh a chawlhsan, 1970-1980 chhung khan Telford United chu enkawl ve mah se team dang enkawl a nei lo.