Ramsey leh Juventus inrem ta

Arsenal player awm lai zinga senior ber, midfielder Aaron Ramsey chuan Juventus chu kum li chhung atan inrem lailawkna a neihpui ta a, Italian club lianah hian kar khatah £400,000 a hlawh dawn! Wales international hi British player zinga hlawh hnem ber a ni ang.

Kum 28 mi Ramsey hi season 11 chhung hun a hman tawhna Gunners tana a contract neih lai hi tun season tawp rualin a tawp dawn avangin July 1 aṭangin Juve hi free agent in a zawm dawn - January thla aṭang khan club dang nen inrem lailawkna (pre-contract agreement) a nei thei tawh a ni.

Arsenal hian season 11 chhung an enkawl tawh Ramsey hi nikum khan contract thar ziahpui an tum a, thui tak pawh an kal hman. Mahse, Arsene Wenger a chhuah hnua club thuneitu ṭhenkhat siksawi a awm tak hnuah sum chungchangah an inrem thei ta lo a, club lamin an contract zawrh lai an hnuk kir.

Manager thar Unai Emery-a'n Ramsey awm loh hun tur thlir lawkin a chhawr rim duh lo zui a, Wales international hi bench-ah dah a ni ṭhin. Mahse, khelmuala inlana hun a neih phawt chuan phur leh thatho takin a khel ṭhin, a ṭawng tam loh bakah ṭhahnem a ngaihna hi fans lamin an ngainat zual chhan a ni.

North London club chuan thuchhuah siamin, "Cardiff City aṭanga 2008-a a rawn kal hnuah Aaron hian club tan thil ṭha tam tak a ti tawh a, puitling taka hun a hman thiamna hi Arsenal chuan kan thinglungah kan vawng reng ang. Juventus a zawm hma, kan hnena hun a la hmang tur hi a ṭha thei ang bera min hman pui kan beisei," an ti.

Tun lai khawvelah player man a sang tawh a, chutih laia Arsenal midfielder pawimawh ni phak free agent-a lakluh theih chu thil chakawm a ni. Juventus hma hian Barcelona nen inbiakna an nei a, Catalan club bakah hian Paris St-Germain chuan contract duhawm tak an zawrh bawk.

Real Madrid, Bayern Munich leh Inter Milan te pawhin an ngaihven a, a bik takin Real forward Gareth Bale chuan ram tana a khelhpui hi Madrid khawpuia kal tur a duh thu a sawi bawk - club lian dang aṭanga sawmtu a hmuh ṭhat karah Champions League nomawi chawi tum Juventus a zawm hi a mak lo.

Juventus chuan, "Aaron Ramsey leh kan club chuan 1st July 2019 aṭanga 30 June 2023 thleng daih contract kan ziak fel," tiin thuchhuah an siam. Player ṭha lakluh harsat ve tak Arsenal-in an hman thiam sa an chelh lo hi a mak a, a thlak nan European club lian dangin an awh rawn khawp a ṭha player hmuh a awlsam lo ang.

Instagram kaltlangin Ramsey hian Arsenal a mangṭha tur chungchang a tarlang, "Juventus nen chuan inrem lailawkna kan nei ta, rawlthar te ka nih lai khan Arsenal hian min lo kuangkuah a, North London-ah season 11 chhung hun hlimawm tak ka hmang. Hun harsa leh hrehawm ka paltlang laia min phatsan ngai lotu fans rinawm chungah lawmthu ka sawi.

"Season hman hmabak ka la neihah hian club tan 100% in ka theihna ka hlan chhunzawm dawn a, Turin lama hringnung zinkawng thar ka zawh hma hian ka club tan hian a ṭha thei ang bera hun tawp hman ka tum a ni," tiin a sawi.

Ramsey hian Arsenal tan inelna hrang hrangah match 357 a khelh aṭangin goal 61 a khung a, 2014, 2015 leh 2017 khan FA Cup nomawi a chawipui, vawi thum an champion zinga ṭum hnihah hian chakna goal a khung a ni.