Magpies lakah Wolves an vannei

Premier League tlak hlauh­­thawnawm dinhmuna ding New­castle United-in Wol­ver­hamp­ton Wanderers khelmualah hun rei zawk hma hruai mah se injury time-ah goal an chhuah a, 1-1 in an inhnehtawk. 

Thawhṭanni zan inkhelah Newcastle tan hian Isaac Hayden chuan goal hmahruai a khung a, Magpies hian an chak pui mai dawn nia a lan hnuah Willy Boly chuan hun pek belhah si phurh sutna goal a tauh lut. 

Injury time-a Wolves-in goal an khung danah referee thutlukna chu sawisel theih tak a ni a, Newcastle boss Rafael Benitez a lungawi lo - hei chauh lo pawh sawisel tur a nei nual!

Spanish manager chuan, "England-ah chuan eng dan mah hi an hre tak tak lo a, i duh apiang i sawi mai mai thei ang," a ti a, insum a tum lo.

Mualneitu Wolves-in in­khel an thunun zawk a, goal khungna pawh hun tam an insiam. Newcastle erawh fimkhur takin an khel a, counter attacking football chu inghah nan an hmang. 

Wolves tan Matt Doherty leh Raul Jimenez te chuan hnai set sawt aṭangin an hlah a, Magpies erawhin an hun neihah an hlah ve lo. Minute 56-naah Hayden chuan goal hmahruai a khung a, Fabian Schar-a ball siamsak a ṭha takzet. 

Newcastle-in hnehna an chang mai dawn niin a lang a, mahse injury time-ah beisei loh thil a thleng. Adama Traore ball pet luh chu Boly-a'n hun pek belh minute nganaah a tauh lut a, hun a tawp zui!

Boly hian ball a tauh dawn hian a kut pahnihin Newcastle goalkeeper Martin Dubravka darah a kut pahnih a nghat a, foul ham tur ni mah se referee Graham Scott-a'n a ham tlat lo.

Magpies boss Benitez chuan, "Hun tawpa thil thlen dan kha chuan minti lawm lo hle a ni. Keeper te hi a ṭul hunah chuan chhan an ngai em em a, thil thlen dan kha sawithiam a har zawk a ni," a ti. 

Thawhṭanni zana inkhelah hian Magpies tan an player manto ber leh a vawi khat nana inlan Miguel Almiron chu Wolves-in goal an khung hma hian an 'foul' ngei niin a lang a, hei pawh referee-in a ham chuang lo. 

Benitez chuan, "Almiron laka mi pawh kha foul a ni mai thei a, sawi tur tam tak a awm. Mahse kan sawi ṭeuh avang hian thil a danglam dawn lo. Chu chu match hmasaah pawh kan hre tawh a ni," a ti. 

December khan Magpies hian 1-2 in Wolves hi an lo ngam lo tawh a, hemi ṭum pawh hian Benitez hi a defender DeAndre Yedlin-a red card hmuh dan leh penalty an hmuh ngei tura ngaih pek a nih loh danah a lawm lo tawh. 

Magpies-in point thum hlawh tura an inngaih hnuah point khat chiah an nei a, table-ah 16-naah chho mah se relegation zone aṭanga an himna chu point khat chauh a nih avangin referee thutluknaa Benitez a lungawi lo viau pawh hi a awm lo hran lo. 

Benitez chuan, "Kan goal chhuah danah lawm a harsa a ni. Point khat kan neih belh ngei a, mahse point thum nei thei kan nih avangin lawm a harsa a ni," tiin a sawi. 

Wolves boss Nuno Espirito Santo chuan referee chhanin, "Referee hna hi thil harsa tak a nih avangin kei chuan ka sawisel thei lo," a ti a, an goal khung dan chu a ennawn leh tur thu a sawi bawk. 

Premier League table-ah Wolves hian pasarihna dinhmun an luah mek a, 'Big Six' tia hminglem an pek Manchester City, Liverpool, Tottenham Hotspur, Manchester United, Arsenal leh Chelsea chiah a chunga awm an ni.