Westbrook-a'n record ding rei a khum

Oklahoma City Thunder star Russell Westbrook chuan kum 51 chhung NBA record lo ding tawh chu a khum a, tun hnaiah a zawnin match 10 chhung triple-double a nei thei a ni.

Wilt Chamberlain-a'n kum 1968 daih tawhah record a lo siam tawh, a zawna vawi kua ngawt triple-double a neih chu Pathianni khan a nihrual tawh a, nimin zing khan Portland Trail Blazers 120-111 a an hneh ṭumin he record hi a rawn khum ta chiah.

Portland Trail Blazers lakah hian Westbrook-a'n point 21 a score bakah, rebound vawi 14 lain assist vawi 11 a nei bawk. Tunder tana a khelhpui Paul George chuan point 47 neiin a score hnem ber a ni thung.

NBA-a triple-double an tih hian, player pakhatin match pakhat bikah - point, rebound, assist, steal leh block zinga a eng emaw ber pathum aṭanga double digit a neih tlin kimin a ni. 

Kum 30 mi Westbrook chuan, "Kei chuan court chhunga ka luh tawh hi chuan nuam ti taka khelh tawp mai hi ka duh ber, khingpuite hneh ngei tumin ka theihna zawng zawng ka hlan ṭhin, result ṭha kan neih hian ka hlim ber.

"Ṭha taka kan khel a nih chuan kan hriat loh karah record hi a lo thleng ve mai ṭhin a, tun ṭuma ka thil tawn pawh hi ka beisei loh leh hriat loh kara rawn in herchhuak a ni," tiin a sawi.