Wembley Stadium-ah Sancho inkhel dawn

"Ka chhungte hmaah ka inkhel dawn, he thil hi ka naupan lai aṭanga ka lo suangtuah tawh ṭhin chu a ni," tiin Jadon Sancho chuan a sawi, zanin dar 1:30-a Tottenham Hotspur leh Borussia Dortmund ten Champions League last 16 an khelh tur hi English rawlthar duhawm vangin a boruak a lian hle.

Premier League champion Manchester City leh Liverpool te elphak khawpin Tottenham an khel ṭha mek a, an mikhual Dortmund pawh German champion Bayern Munich chunga awm lai an nih avangin, player ṭha ṭhenkhat inlan thei lo tur awm mah se team pahnih hi an ṭhat lai tak a ni.

Trinidad and Tobago lam chhuak Sean-a fapa Sancho hi a hming tak chu Jadon Malik Sancho niin, 25 March 2000 khan Camberwell, England-ah a piang. A rualpui zingah football pet a thiam fal nghal a, talent a neih ṭhat avangin kum sarih mi chauh a nih laiin Watford a pan.

A hun hmasa lam awiin Sancho chuan, "West London lama awm Harefield Academy-a inzir kha ka duh lo, kar khata ni thum ngawt mai London khawpui rel hmanga fan kual a ngai ṭhin kha a nuam ka ti loin zin kha ka peih lo. Mahse, kei aia ka nihna hrechiang tute khan ka tana ṭha ber tur a nih thu min hrilh avangin an thu ka zawm.

"Inah hian ka nu kiangah hun ka hmang ber a, kan in ka chhuahsan ni hmasa ber kha chuan hrehawm ka ti hle. A tir lam kum hmasa ho kha chu a awlsam lo, mi ṭhenkhat khan 'heta awm reng nge ina awm in duh?' tiin min zawt fo. Football ka hmangaih avangin a kawng hrehawm zawk chu ka thlan a ngai si a ni," tiin a sawi.

Watford-ah hian hun a hmang rei lo, March 2015 khan Manchester City lamah a insawn. Man City academy-ah hian a thiamna hmuh hmaih theih a ni lo a, mahse player ṭha an tam avangin senior team tana khelh nghal mai chu beisei ngam chi a ni lo. Pep Guardiola hnuaiah Manchester City-in league nomawi an chawi a, 2017 khan pre season tour an neih dawnin Sancho hi squad-ah telh a ni lo. 

Man City tan khelh phak mai a la beisei awm loh avangin Sancho hian khaw dang hawi a thlang a, 2017 khan German club ṭha Dortmund nen hun rei lote chhungin inremna an ziak a, junior team tan match thum a khelh hnuah senior team squad-ah telh zui nghal a ni bawk.

A ṭha chu thup theih a ni lo, Dortmund tan hian player rinrawl a ni phak ngal a, league match 21 a khelh aṭangin goal riat a khung bakah a ṭhiante khung tur vawi kua a siamsak tawh bawk. Club tana a khelh ṭhat avangin England tan pawh koh a ni tawh a, kum 2000 hnu lama piang zingah an ram tana khel phak hmasa ber a ni.

A hun tawn chungchang sawiin Sancho chuan, "Tun dinhmun thleng tur hian a awlsam lo, nitin rim taka training neih a ngai. Dortmund-ah hian player ṭha an tam a, a bik takin Marco Reus, Mario Gotze leh Axel Witsel te hian entawn tur ṭha tak min hrilh thei reng. Dortmund hi ka tan hmun ṭha a ni a, hma hun êng tak ka neih theih nana hma min laksaknaah hian lawmthu ka sawi seng lo," a ti.

Tottenham leh Dortmund te hi season hmasa khan group khatah an awmdun a, EPL club hian vawi hnih an hneh. Mauricio Pochettino naute hian an mikhual tur hi an huphurh hran lo ang. Mahse, 2017 season khan Thomas Tuchel-a'n a enkawl laiin Spurs hi last 16-ah 5-1 in an sawp ve tawh tho.

Dortmund winger Sancho chuan, "Ram tana ka khelhpui ṭhian ṭhnekhat te nen message hmangin kan inbe ṭhin a, Spurs hmachhawn tur kan kan inpeih thu leh, Wembley-ah ngei hnehna chan kan tum thu ka hrilh tawh," tiin a sawi. England international Dele Alli leh Harry Kane te erawh hliam vangin a hmachhawn lo ang.

Argentine manager Poch-a'n tlarhma lamah a player ṭha ṭhenkhat a chhawr theih loh avangin hian Son Heung-min chu innghahna a ni leh dawn a, midfielder Christian Eriksen a khelh ṭhat chhoh leh tawh avangin Denmark international leh South Korea tlangval hi Dortmund tana ven ngun ngai bik tur an ni.

Lucien Favre-a naute pawhin an ṭhat theih dan berin Spurs a hmachhawn dawn bik lo. Captain Marco Reus chu malpui hliam vangin a tel thei dawn lo, mahse Christian Pulisic leh Paco Alcacer te a la neih avangin buaina tur a awm lo ang. Chutih rualin Germany international Reus hmunruak hnawhkhah erawh a awlsam dawn lo.