Osaka leh coach inṭhen

Tennis hmeichhe world number 1 Naomi Osaka leh a coach Sascha Bajin te chu kum khat chuang deuh an thawkdun hman tihin an inṭhen a, an thawhdunna an tih tawp chhan hi puanzar a ni lo.

Season hmasa khan Osaka hian Grand Slam hmasa ber ni turin US Open nomawi a chawi a, a coach Bajin hi WTA coach of the year atan thlan a ni. Kuminah pawh season bul an ṭan fuh a, major tournament hmasa ber Australian Open-ah pawh a champion.

Mahse, tun dinhmunah Osaka hi a hnungzâng na vangin a inkhel thei lo mek a, hei vang hian Qatar Open aṭang pawhin a inhnukdawk. Australian Open nomawi a chawi aṭanga ni 16 hnu leka coach nen an inṭhen hi Osaka tan chanchin ṭha a ni lo ang.

Kum 21 mi Osaka chuan, "Sascha nen kan thawkdun tawh dawn lo, min kaihhruai tawhna zawng zawngah lawmthu ka sawiin, a kal zelna turah duhsakna ka hlan," tiin Twitter kaltlangin an puang.

Bajin hi tun hmain Serena Williams, Victoria Azarenka leh Caroline Wozniacki te nen pawh an thawkho tawh a, coach tawnhriat ngah leh fing tak a ni. Bajin chuan, "Hun hlimawm kan hman dun avangin ka lawm, engmah tham ni lo mah se duhsakna sang ber ka hlan che," tiin a sawi.

Osaka hian 2018 season khan world number 72 ni chungin bul a ṭan a, coach ṭha Bajin kaihhruaina hnuaiah nasa taka hma sawnin - Australian Open nomawi a chawi rual khan WTA ranking-ah pawh a chungnung ber dinhmun a luah nghal a ni.