Oldham Athletic manager Paul Scholes Mourinho-a'n kan result a ngaihven ang - Scholes

League Two club Oldham Athletic chuan manager atan Paul Scholes chu Thawhṭanni khan an lalut. Kum 44 mi Scholes hian thla 18 chhung atan contract a ziak a, nizan khan match hmasa berah Yeovil Town chu an mual Boundary Park-ah mikhualin result kan hre hman lo.

Manchester United tana a inkhelh hunchhung zawng hmangtu Scholes hian a naupan laia a club ṭan Oldham chu manager hna a thawhna hmasa ber atan a thlang a, TV pundit nichunga a ngaihdan tlang taka a sawi ṭhin avangin League Two club inkhel result hian ngaihven a hlawh ang.

Scholes chuan, "Phur lo ilang chuan helai hmunah hian min hmu lo ang. Ka inbuatsaih ṭha a, an khelh dan pawh ka en a, match tam tak chak thei turah ka ngai. An thei ta lo a nih chuan ka thiam loh a ni ang," tiin beseina a neih san thu a sawi.

Oldham Athletic hi League Two-ah 14-naah an awm mek a, playoff khel pha chin pasarihnaa awm Exeter City (51 pts) pawh point kua lai a nih avangin season thara League One khelh a harsa tawn dawn. Scholes chuan, "League sang zawk khelh tumin kan bei tur a ni. Tun season-ah erawh a harsa tawh dawn a, kan thei ta lo a nih chuan season thara kan hmachhawp tur a ni ang," tiin a ṭawng fimkhur hle.

Oldham neitu Abdallah Lemsagam chuan, "Scholes-a'n he club a hmangaihzia leh he hna a duh tih hi zep rual a ni lo a, kan chhungkuaa kan lalut thei hi ka lawm. Kan theihna zawng zawngin kan thlawp dawn a, hlawhtlinna min chanpui ngei kan beisei tlat a ni," tiin a sawi.

England leh Manchester United midfielder hlui Paul Scholes hian Salford City-ah 10% neitu nihna a nei a, he club hi National League-ah awm mekin season thara 'promotion' an hmuh chuan League Two a awm thei an ni.

England Football League danah chuan mi pakhatin thuneitute hriatpuina loin club pahnihah nihna an chelh kawp thei lo. Amaherawhchu neitu nihna 10% emaw a aia tlem chu pawisa peipunna liau liaua ngaih a nih avangin Scholes hi an hrethiam.

Chutihrualin Scholes hian a rilru zawng zawng Oldham-ah pek a duh avangin club director hna a chelh a rawn bansan dawn. United midfielder hlui chuan, "Salford-ah hian tih tak tak ka nei lo a, a nihna takah chuan an fan ka ni ber e. Engtik niah emaw chuan kan la inhmachhawn ang a, chak an tum ang a, keini pawhin hneh kan tum ang," tiin a sawi.

Salford City-ah Scholes bakah United tana khelhpui Phil Neville (10%), Gary Neville (10%), Nicky Butt (10%), Ryan Giggs (10%) leh David Beckham (10%) te nen neitu nihna an nei a. Class of 92-in Salford an enkawl hnuah hian ṭum thum promotion an hmu tawh a, hma an sawn hle.

Paul Scholes hian TV pundit a nih laiin a club hlui Manchester United enkawltu Jose Mourinho a sawisel nasa a, ṭawngkam pawh a duh tui lo. Scholes hian, "A lei a veng zo lo a, Manchester United timualphotu a ni," tih tein a khak a, hemi ṭum hian Portuguese manager chuan, "A ngaihdan a sawi ringawt lo a, a sawisel a ni. Paul hian manager nih te a la tum ve ngai a nih chuan ka hlawhtlinna 25% tal chu a neih ve theih ka beisei. Chu chu nomawi paruk vel a ni ang," tiin a nomawi chawi zat hmun lia ṭhena hmun khat pawh a tih theih a beisei loh thu a sawi.

Tunah chuan Scholes hian manager hna a chelh ta a, an team enkawl khelh dan an zir chian sak ve dawn a, hei hi amah ngei pawhin a hrechiang hle. Scholes chuan, "Mourinho hian kan result chu a ngaihven ang. Kan inkhel a en kher erawh ka beisei lo," tiin a sawi.

Scholes hi England golden generation zinga mi a ni a, midfield-a a awmpui Steven Gerrard chuan Scottish club Rangers FC a enkawl a, Frank Lampard pawhin Championship club Derby County a enkawl. United tana a khelhpui Gary Neville-a'n La Liga club Valencia tan bul a ṭan a, a hlawhchham; Ryan Giggs erawhin an ram Wales a enkawl thung.

Hetihlai hian Scholes chuan club tenau Oldham-ah bul a ṭan a, mah se an club dinhmun aṭanga thlir a fuh lo ang. Oldham hi Scholes te chhungkua tan chuan club pawimawh tak a ni a, amah mai bakah a pa club ṭan a ni.

Paul Scholes hian a inkhelh hun chhung zawngin Manchester United tan chauh a khel a, loan pawhin a chhuak lo. English midfielder hlui hi United tan vawi 718 a inlan a, Premier League match 499 khelin inelna hrang hrangah goal 155 a khung sak.

Kum 2010-11 season zawh khan inkhelh a chawlhsan a, kum 2012 ṭantirhah rawn let lehin hemi season hian United chu league-ah a champion pui.

Scholes hian Premier League nomawi 11 a chawi a, FA Cup nomawi pathum, League Cup nomawi pahnih, Champions League nomawi pahnih bakah FIFA Club World Cup nomawi pakhat a chawi bawk.

England tan pawh ṭum 66 zet a inlan a, Euro 2004 zawh khan club tana inpek pum hlum a duh avangin ram tana inkhelh hi a chawlhsan. Manager hnaah tawnhriat a la nei tam lo a, kum 2014-a David Moyes ban a nih khan Ryan Giggs puiin hun rei lote chhung United coaching staff-ah a tel tawh.