Midang chunga leng Milwaukee Bucks

NBA regular season kal laia team hmuhnawm bera chhal ngam Milwaukee Bucks chuan match 32 ngawt hnehna an chang ta, an match hnuhnung berah San Antonio Spurs chu 127-118 in an hneh.

Bucks innghahna Giannis Antetokounmpo chuan point 32 a nei leh a, a team hi vawi 32 a chakpui tawh bakah ṭum nga chiah an tlawm avangin Eastern Conference lamah fal takin hma an hruai. An hnuai chiaha awm Boston Celtics chu vawi 25 chauh an la chak thei.

Most Valuable Player nilai Antetokounmpo-a'n point 32 a neih zinga 19 zet chu third quarter bika a vawm luh a ni a, team pahnih an inbeih tawk lai taka point pawimawh a nei thei khan hnehna an chan theih nan kawngro a su nasa hle. Krismas ni khan Bucks hi Philadelphia 76ers lakah an chak lo, a hnu lamah erawh a zawnin match nga hnehna an chang leh tawh. Tukin zing dar 7:00 hian San Antonio Spurs nen an inhmachhawn leh ang. Beisei phak lo Golden State Warriors erawh Detroit Pistons lakah 111-104 in an chak lo leh tawh a, GSW hi season kal laiah vawi 28 ngawt tlawm tawhin a zawnin ṭum kua an chak tawh lo.