Final round thleng lo thei dinhmunah Mizoram an ding Tlai dar 2:00-ah Mizoram Vs Meghalaya

Kum 2019 Santosh Trophy final round-ah champion ngun ber West Bengal, vawi ruk champion tawh Kerala leh team ṭha Tamil Nadu te an thleng zo lo. Mizoram hian inelna hnuhnung pangaah vawi khat champion-in vawi thum semifinal lut mah se tla thei dinhmunah an ding.

Vawiin tlai dar 2:00 hian Lammualah Mizoram leh Meghalaya te an inhmachhawn dawn a, a chak zawkin final round an lut dawn. Minute 90 chhunga chak zawk an awm lo a nih chuan penalty shootout hmangin chak zawk zawn tur a ni a, vawiin tlai North East Zone qualifying round inkhel hi a pawimawh a, a hmuhnawm bawk ang.

Meghalaya-in match hmasa berah Tripura 3-0 in an hneh a, minute 11-na lekah Donlad Diengdoh hmangin hma an hruai a, minute 42-naah Brolington Warlarpih-a'n khung belhin first half-ah 2-0 a ni hman. Second half-ah Donlad-a'n minute 53-naah a khung belh a, goal dang a luh belh tawh lo.

Coach Khlain Pyrkhat Syiemnlieh hote hian goal li mamawh ni se goal dang an khung belh theih ngei a rinawm a, amaherawhchu match hmasa ber an khelh avangin an goal mamawh zat an hre lawk lo a, goal khung châkna tak tak an neih tawh loh avangin 3-0 in inkhel a tawp.

Mizoramin an goal mamawh zat hre lawk chungin Nilaini khan Tripura an hmachhawn a, goal li khung an mamawh laiin 3-0 thoin an chak.

Inelna thlengtu hian goal hmasa ber hi minute 15-naah Ramhlunchhunga hmangin an khung a, first half-ah goal dang an khung belh thei lo. Second half-a penalty an hmuh zarah MC Malsawmzuala'n minute 50-naah goal hnihna a khung a, minute 60-naah Kolasin rawlthar Chhunga'n Mizoram goal thumna a khung leh bawk.

Coach Lalsangzuala Hmar hote hian Meghalaya aiin goal an khung tlai zawk zel a, inkhel result hre sa chungin goal li an khung thei lo a, an khelh dan thlir tel loin statistics aṭanga a lan dan chuan Mizoram hi team ṭha lo zawk tiin a sawi theih.

Mizoram leh Tripura inkhel hi Meghalaya coach Khlain Pyrkhat chuan uluk takin a thlir a, inkhelh banah, "A lawmawm hle mai. Kan tan chuan result ṭha a ni," tiin Vanglaini a hrilh.

Mizoram hian goal khat dang chu khung belh se Meghalaya tan match hnuhnung berah chak ngei ngei a ngai dawn a, tunah chuan an in draw a nih pawhin penalty shootout hmangin beiseina an nei thei ang.

Khlain Pyrkhat chuan, "Mizoram hi team ṭha tak an ni a, anmahni khelmuala khel tur an nih bawk avangin team ṭha zawk an la ni tho. Chutihrualin final round luh tumin Aizawl hi kan rawn kal a, kan beiseina tihlawhtling turin kan theihna zawng zawng kan chhuah ang," tiin hnehna chan ngei an tum.

Meghalaya coach Khlain Pyrkhat hi tawnhriat nei ṭha tak a ni a, Shillong club ṭha Rangdajied United F.C. (Arhima) coach niin AIFF D Licence Instructor a ni a, a kaihhruaina hnuaiah D Licence course hi Mizoramah pawh an kalpui tawh. 

Tawnhiat hmang ṭangkai thei turin player ṭha captain Brolington Warlarpih bakah Shillong Lajong leh Kerala Blasters tan pawha khel tawh Samuel Shadap te an kawl avangin Mizoram tan chetsual theihna a ni.

Mizoram team hi kum dang zawng aiin an naupang a, vawi khat inlanna an awm nawk avangin Tripura laka goal li an mamawh laia goal thum chauh an khung pawh hi tawnhriat neih tam tawk loh vang tiin a sawi theih.

Tripura nen an inkhelh ṭum hian Under 21 pali keeper RS Lallawmzuala, defender Lalchhuanmawia, midfield KC Larchhuakmawia leh forward Ramhlunchhunga ten inkhel bul an ṭan a, bench aṭangin David Laltlansanga a lut bawk.

Mizoram coach Lalsangzuala Hmar hian player naupang zawk a ring ngam hi a fakawm a, amaherawhchu final round an lut ta lo a nih chuan fakna ri hriat nawn tur a awm dawn lo. Tun dinhmuna pawimawh hmasa ber chu final round thlen a ni a, Mizoram tan mahni muala Meghalaya laka tlawm chu mualphona a ni.

Coach Sanga chuan, "Kan squad neih ang hi a ṭha thei ang bera hman a ṭul a, kan khelh dan thlak hret dawn. Keeper T. Mawia leh forward Dawngtea te pawh kan chhawr tawh dawn a, chak ngei tumin kan khel ang," tiin Vanglaini a hrilh.

Tripura nena inlan lo Zothanmawia leh MS Dawngliana te hi Mizoramin National Games 2015-a gold medal an lak ṭuma player pawimawh a ni a, Meghalaya nen an tawnhriat ringawt pawh hi itawm tham a tling.

Santosh Trophy-ah hian playing eleven-ah Under 21 player pathum awm reng tur a ni a, hei hi coaching staff te lu ti aitu a ni pha a, amaherawhchu Meghalaya pawh he dan hnuaia awm ve tho a nih avangin Khelo India Under 21 champion team kawltu Mizoram tan chuan chanchin lawmawm tih pawhin a sawi theih ang.

Mizoram hian kum 2014-a Santosh Trophy an champion ṭum khan qualifying round khelh zawhah Dr T Ao Memorial Football Tournament an khel nghal a, final-ah Mizoram hian Meghalaya hi awlsam taka an hneh theih tura ngaih a nih laiin penalty shootout hmangin an hneh hram. Tun ṭumah pawh Mizo mipui ngaih ṭha taka awmna chi a ni lo a, Mizoram football team ṭawiawm a ṭul ang.