Champion lai Real an chak hram

Real Madrid chuan Champions League last 16 first leg-ah vannei takin hnehna an chang hram a, an mikhualna ramah Ajax chu 2-1 in an hneh. 

European champion lai Real Madrid tan Karim Benzema leh Marco Asensio ten goal an khung a, Hakim Ziyech chuan Dutch club goal neihchhun a khung thung. 

Real-in an goal hnihna an khung hian hun tawp nan minute thum chiah a awm tawh a, Ajax-in Nicolas Tagliafico hmanga an goal khung chu video assistant referee hmanga enfiah a nih hnuah pawm a ni lo bawk. 

Ajax hian March 5 zanah last 16 second leg khel turin Real Madrid hi an lenchilh dawn a, tlang tur chuan si hnih faia hnehna an chan a ṭul ang. 

Minute 38-naah Ajax-in goal hmahruai an khung niin a lang a, Tagliafico chuan a tauh lut. He goal khung tur hian Lasse Schone-a corner pet chu Matthijs de Ligt-a'n a tauh lut a, Thibaut Courtois chuan man nghet thei loin a dang per. 

Belgian keeper ball man per hi Tagliafico hian a tauh lut a, Ajax fan-ten goal hmahruai an khung nia ngaiin an lam a, Real player-ten goal chhuah niah inngaiin an ngui. 

Mahse, referee-in VAR rawn a ṭulah ngaiin inkhel a titawp a, goal hi a pawm lo - referee hian Dusan Tadic chu goal luhna kawngah offside leh keeper tibuaiah a ngai a, replay ennawn ngial pawhin thutlukna siam harsa tak a ni. 

Referee pawh hian awlsam takin thutlukna hi a siam bik lo. VAR rawnna hun atan minute hnih leh second 50 ngawt hun a hmang a, Champions League last 16-a a vawi khat nana VAR hman chu a vanneihpui hmasa berah Real an ṭang.

Goal lut loin chawlhlawk hman a ni a, minute 60-naah Real-in goal an khung ta nge nge. Kum 18 mi, Real tana Champions League-a inlan thei naupang ber Vinicius Jr chuan Karim Benzema tan a siamsak a, French striker hian ṭha zetin goal-ah a chantir. 

Mahse, khel ṭha zawk Ajax an beidawng lo. Minute 75-naah Ziyech chuan si phurh sutna goal a khung - kum 25 mi midfielder hian tun season Champions League-a shot vawi 30 a neihna a ni a, ani tluka shot ngah an la awm lo. 

Team pahnih hi 1-1 in an ṭin mai dawn niin a lang hman a, mahse Real tum dan a ni lo. Minute 87-naah Asensio chuan Dani Carvajal-a siamsak chu ṭha zetin goal-ah a chantir a, 2-1 in an chak.

 

Real Madrid tana a match 600-na kheltu Sergio Ramos chuan tlai khawhnuah yellow card a hmu a, Spanish defender hian yellow card hmuh hnem vangin second leg-ah Ajax a hmachhawn ve thei lo ang. 

Ajax hi VAR hmanga goal pawmsak lo an nih piahlamah inkhel pumpui thlir pawhin an vanduai a, minute 90 chhung inkhel thlirin chak phu zawk an ni. 

Johan Cruyff Arena-a inkhelah Dusan Tadic chuan post a pet per a, kum 30 mi striker hian Real tlarhnung a chhaih buai tluan chhuak zak - tun season-ah goal 22 a khung tawh. 

Ziyech goal khung siamsaktu David Neres chuan goalkeeper Courtois chiah a hmachhawn chungin goal-ah a chantir thei lo a, si phurh sutna remchang injury time-a an neihah substitute bench aṭanga luhtir Kasper Dolberg chuan a hun neih a chhawr lo bawk. 

Ajax hi zam lutuk tur erawh an ni lo. March-a Santiago Bernabeu an len hmain Real hian La Liga-ah Barcelona an mikhual dawn a, Ajax tan hna a awlsam phah sawt theih ang.